تہران: مشیر ایرانی سپریم لیڈر علی اکبر ولایتی نے کہا ہے کہ ایران دشمنوں کے خلاف سیسہ پلائی ہوئی دیوار ہے اور ملک ہر قسم کے دباؤ کا مقابلہ کرنے کی صلاحیت رکھتا ہے۔
غیر ملکی میڈیا رپورٹس کے مطابق علی اکبر ولایتی کا کہنا تھا کہ ایران کے مخالفین کی صفوں میں گہری دراڑ پیدا ہو چکی ہے، جبکہ امریکا ایران میں اندرونی اختلافات کی باتیں کر رہا ہے۔
انہوں نے دعویٰ کیا کہ حقیقت میں امریکا، برطانیہ اور یورپ کے درمیان کشیدگی میں اضافہ ہو رہا ہے، جبکہ متحد ایران اس وقت امریکا اور اسرائیل کے گٹھ جوڑ کے سامنے ڈٹ کر کھڑا ہے۔
دوسری جانب ایران کی وزارت دفاع کے ترجمان جنرل رضا طلائی نِک نے کہا ہے کہ ایران کی میزائل صلاحیت کا ایک بڑا حصہ اب بھی استعمال نہیں ہوا۔
ایرانی خبر رساں ایجنسی کے مطابق ترجمان نے اپنے بیان میں کہا کہ ایران کے پاس دفاعی صلاحیتیں موجود ہیں اور ضرورت پڑنے پر انہیں بروئے کار لایا جا سکتا ہے۔
