لاہور: صوبائی دارالحکومت کے علاقے اکبری گیٹ میں ایک افسوسناک واقعہ پیش آیا جہاں 5 سالہ معصوم بچی نالے میں گر کر جاں بحق ہوگئی۔
پولیس کے مطابق بچی رکشہ پر بیٹھی تھی کہ اچانک نالے کی دیوار گر گئی، جس کے باعث وہ رکشہ سمیت نالے میں جا گری اور موقع پر ہی دم توڑ گئی۔ حکام کا کہنا ہے کہ حادثہ موچی گیٹ پارکنگ پلازہ کی دیوار گرنے کے باعث پیش آیا۔
یہ واقعہ سٹی ڈویژن میں حالیہ دنوں کے دوران پیش آنے والا دوسرا بڑا سانحہ ہے۔ اس سے قبل بھی ایک خاتون اور اس کی بیٹی نالے میں گر کر جان کی بازی ہار چکی ہیں۔ پولیس نے واقعے کی تحقیقات شروع کر دی ہیں جبکہ شہریوں نے حفاظتی اقدامات نہ ہونے پر تشویش کا اظہار کیا ہے۔
دوسری جانب کراچی کے علاقے آئی آئی چندریگر روڈ پر واقع ریلوے کالونی میں ایک شخص کھلے مین ہول میں گر کر جاں بحق ہوگیا۔ اطلاع ملنے پر ریسکیو ٹیمیں فوری طور پر موقع پر پہنچ گئیں اور لاش کو نکال کر قریبی اسپتال منتقل کر دیا گیا۔
مقامی افراد نے کھلے مین ہول اور انتظامیہ کی غفلت پر شدید ردعمل دیتے ہوئے فوری اصلاحی اقدامات کا مطالبہ کیا ہے۔
