واشنگٹن: امریکی میڈیا نے ایران اور اسرائیل کے درمیان ممکنہ جنگ روکنے میں پاکستان کی سفارتی کوششوں کو سراہا ہے۔ رپورٹس کے مطابق پاکستان میں ایک اہم میٹنگ کے انعقاد پر کام جاری ہے جو رواں ہفتے ہو سکتی ہے۔
سی این این اور وال اسٹریٹ جرنل سمیت معروف امریکی میڈیا اداروں نے پاکستان کی کامیاب ثالثی کا اعتراف کیا اور اسے خطے میں امن کا ضامن قرار دیا۔ سی این این کی رپورٹ میں کہا گیا کہ امریکی حکام نے تصدیق کی ہے کہ پاکستان میں ایک اہم اجلاس کے لیے تیاری جاری ہے۔
ذرائع کے مطابق اس اجلاس میں کشیدگی کم کرنے کے لیے امریکی نائب صدر جے ڈی وینس خود پاکستان کا دورہ کر سکتے ہیں تاکہ براہِ راست مذاکرات کو آگے بڑھایا جا سکے۔
وال اسٹریٹ جرنل کے مطابق صدر ڈونلڈ ٹرمپ ایران کے ساتھ تنازع کو اگلے 4 سے 6 ہفتوں میں مستقل حل کرنا چاہتے ہیں تاکہ مئی میں چینی صدر سے ملاقات سے قبل وہ عالمی اقتصادی ایجنڈے پر مکمل توجہ مرکوز کر سکیں۔
یہ پیش رفت خطے میں بڑھتی کشیدگی کے حل کے لیے پاکستان کی اہم سفارتی کوششوں کی تصدیق کرتی ہے اور عالمی میڈیا کی توجہ کا مرکز بنی ہوئی ہے۔
