کراچی: پاکستانی شوبز کی مقبول اور شوخ مزاج اداکارہ ہانیہ عامر نے اپنی شادی اور طلاق سے متعلق نجومی کی پیشگوئی پر ایسا طنزیہ ردِعمل دیا کہ سوشل میڈیا پر ہنسی مذاق کا طوفان آگیا۔ اداکارہ نے انسٹاگرام اسٹوری پر ایک مقامی ٹی وی چینل کا کلپ شیئر کیا جس میں ایک نجومی ان کی ذاتی زندگی کے بارے میں دعویٰ کرتے ہوئے کہا کہ زائچے کے مطابق ہانیہ عامر کو 2026 میں طلاق کا سامنا ہوسکتا ہے۔
ہانیہ عامر نے اس پیشگوئی کا جواب ہمیشہ کی طرح مزاحیہ انداز میں دیتے ہوئے لکھا: “دلچسپ… پہلے شادی تو ہو جائے”، جس کے بعد صارفین کی جانب سے طنزیہ اور ہلکے پھلکے تبصرے شروع ہوگئے۔
سوشل میڈیا صارفین نے حیرت اور مزاح کے ملے جلے ردِعمل کا اظہار کیا۔ ایک صارف نے لکھا: “ہانیہ، آپ کو پہلے سے علم ہے؟” جبکہ دوسرے نے طنز کرتے ہوئے پوچھا کہ “کیا آپ نے چپکے سے شادی کر لی؟”۔ کچھ صارفین نے تو نجومی پر تنقید کرتے ہوئے کہا کہ “شادی سے پہلے طلاق کی پیشگوئی کیسے؟”۔
اداکارہ کے ایک جملے نے نہ صرف نجومی کی پیشگوئی کو موضوعِ بحث بنا دیا بلکہ سوشل میڈیا پر صارفین کو تفریح بھی فراہم کی۔
