عرب اتحاد نے یمن میں اسلحہ اسمگل کرنے والے دو بحری جہازوں پر فضائی حملہ کیا ہے۔ عرب اتحاد کے مطابق یہ جہاز جنوبی یمن کی المکلا بندرگاہ پر ہتھیار پہنچا رہے تھے، جہاں بڑی مقدار میں اسلحہ اور جنگی گاڑیاں اتاری جا رہی تھیں۔
عرب اتحاد کے ترجمان ترکی المالکی نے بتایا کہ یہ کارروائی بین الاقوامی قوانین کے دائرے میں رہتے ہوئے کی گئی اور اس کی درخواست یمنی صدارتی کونسل کی جانب سے کی گئی تھی۔ ان کا کہنا تھا کہ اسلحہ کی ترسیل یمن کے امن و استحکام کے لیے سنگین خطرہ تھی۔
عرب میڈیا کے مطابق اسلحے کی کھیپ متحدہ عرب امارات سے یمن کے صوبہ حضرموت منتقل کی جا رہی تھی۔ اس پیش رفت کے بعد یمنی صدارتی کونسل کے سربراہ نے متحدہ عرب امارات کی فورسز سے یمن سے انخلا کا مطالبہ کر دیا ہے۔
دوسری جانب سعودی وزارت خارجہ نے ایک بیان میں کہا ہے کہ یمن میں برادر ملک متحدہ عرب امارات کے حالیہ اقدامات پر مایوسی ہوئی ہے۔ بیان میں کہا گیا کہ یمن کے صوبہ حضرموت میں جاری کشیدگی سعودی قومی سلامتی کے لیے خطرہ ہے اور متحدہ عرب امارات کے اقدامات یمن میں قیامِ امن کی کوششوں کے منافی ہیں۔
سعودی وزارت خارجہ نے مطالبہ کیا ہے کہ متحدہ عرب امارات یمنی حکومت کی درخواست پر عمل کرتے ہوئے 24 گھنٹوں کے اندر اپنی افواج واپس بلائے۔ سیاسی مبصرین کے مطابق اس صورتحال سے یمن میں جاری بحران اور علاقائی کشیدگی میں مزید اضافہ ہونے کا خدشہ ہے۔
