بنگلا دیش کے معروف طالب علم اور نوجوان سیاسی رہنما شریف عثمان ہادی کے قتل کے بعد ملک کے مختلف شہروں میں شدید مظاہروں کا سلسلہ جاری ہے، جس کے باعث عام انتخابات سے قبل سیاسی صورتحال مزید کشیدہ ہو گئی ہے۔
شریف عثمان ہادی، جو انقلابی منچا پلیٹ فارم کے ترجمان اور آئندہ عام انتخابات کے امیدوار تھے، گزشتہ جمعے ڈھاکا میں انتخابی مہم کے آغاز کے دوران نقاب پوش حملہ آوروں کی فائرنگ سے شدید زخمی ہو گئے تھے۔ انہیں فوری طور پر مقامی اسپتال منتقل کیا گیا، بعد ازاں بہتر علاج کے لیے سنگاپور لے جایا گیا، جہاں وہ زخموں کی تاب نہ لاتے ہوئے دم توڑ گئے۔
رپورٹس کے مطابق رہنما کے قتل کے بعد ملک بھر میں بھارت مخالف جذبات کے ساتھ پرتشدد مظاہرے شروع ہو گئے ہیں۔ سوشل میڈیا پر وائرل ویڈیوز میں مشتعل مظاہرین کو بنگلا دیش کے بڑے اخبارات پروتھوم الو اور ڈیلی اسٹار کے دفاتر میں توڑ پھوڑ کرتے دیکھا جا سکتا ہے۔
علاوہ ازیں ڈیلی اسٹار کی عمارت میں آگ لگنے کا واقعہ بھی پیش آیا، جس سے املاک کو شدید نقصان پہنچا۔ قانون نافذ کرنے والے اداروں نے صورتحال کو قابو میں رکھنے کے لیے سیکیورٹی مزید سخت کر دی ہے۔
