کراچی : شہر میں رات میں سرد ہوائیں چلنے کا امکان

کراچی : محکمہ موسمیات شہر میں رات میں سرد ہوائیں چلنے کا امکان ظاہر کرتے ہوئے کہا آنے والے دنوں میں موسم مزید سرد ہوگا۔
تفصیلات کے مطابق شہرِ قائد میں موسم کی صورتحال تبدیل ہونا شروع ہو گئی ہے۔ صبح کے اوقات میں ٹھنڈی ہوا اور خنکی جبکہ رات کے وقت سرد ہوائیں چلنے کا امکان ہے۔
محکمہ موسمیات نے آنے والے دنوں میں کراچی کا موسم مزید سرد ہونے کی پیشگوئی کرتے ہوئے کہا س وقت شہر میں موسم خشک اور خنک ہے جبکہ سمندری ہوائیں بند ہیں تاہم آئندہ 24 گھنٹوں کے دوران دن کے وقت موسم گرم اور خشک رہنے کا امکان ظاہر کیا گیا ہے۔
محکمہ موسمیات کا کہنا تھا کہ کم سے کم درجہ حرارت 17 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 35 سے 38 ڈگری تک رہنے کا امکان ہے اور شہر میں ہوا میں نمی کا تناسب 66 فیصد ہے۔
ایئر کوالٹی انڈیکس کے مطابق اس وقت کراچی کی فضا انتہائی غیر صحت بخش قرار دی گئی ہے، شہر میں فضائی آلودگی 256 پارٹیکیولیٹ میٹرز ریکارڈ کی گئی، جس کے بعد کراچی دنیا کے آلودہ ترین شہروں میں تیسرے نمبر پر ہے۔