صوبے بھر کی مساجد سے متعلق بڑا فیصلہ

وزیراعلیٰ پنجاب کی زیر صدارت امن وامان سے متعلق اجلاس میں صوبے بھر کی مساجد سے متعلق بڑا فیصلہ کیا گیا ہے۔
رہنما نیوز کے مطابق وزیراعلیٰ پنجاب مریم نواز کی زیر صدارت امن وامان سے متعلق ساتواں غیر معمولی اجلاس ہوا۔ اس اجلاس میں صوبے بھر کی مساجد سے متعلق بڑا فیصلہ کرنے سمیت کئی اہم فیصلے کیے گئے۔
ترجمان پنجاب حکومت کے مطابق اجلاس میں حکومت کی جانب سے صوبے بھر کی مساجد کی تزئین و آرائش اور بحالی کا فیصلہ کیا گیا اور طے کیا گیا ہے پنجاب کی مساجد میں حکومت سہولتیں فراہم کرے گی۔ مساجد کے اطراف کے راستوں کو کلیئر اور نکاسی کا نظام بہتر بنایا جائے گا۔
اجلاس میں پنجاب میں لاؤڈ اسپیکر ایکٹ کے نفاذ کو موثر بنانے کے لیے سی سی ٹی وی کیمروں اور ٹیکنالوجی کے استعمال سے مانیٹر کرنے کا فیصلہ کیا گیا اور واضح کیا گیا کہ جمعہ کے خطبہ اور پانچ وقت کی اذان کے لیے لاؤڈ اسپیکر پر پابندی نہیں ہے جب کہ مذہبی جماعتیں ضابطہ اخلاق کے مطابق سرگرمیاں کر سکتی ہیں۔
اجلاس کو بتایا گیا کہ پنجاب میں 65 ہزار ائمہ کرام کے وظائف کے لیے صوبے بھر کی مساجد کی ڈیجیٹل میپنگ شروع کر دی گئی ہے۔ مریم نواز نے وظائف پراسس جلد مکمل کرنے کی ہدایت کی۔
وزیراعلیٰ پنجاب نے غیر قانونی اسلحہ سرینڈر کرنے والوں کے تعاون پر اظہار اطمینان کیا جب کہ غیر قانونی طور پر مقیم تارکین وطن سہولت کاری یا معاونت کرنے والوں کے لیے کڑی سزا کا بھی اعلان کیا۔
ترجمان نے بتایا کہ اجلس میں سوشل میڈیا پر نفرت، جھوٹ اور اشتعال پھیلانے والوں کیخلاف کارروائی ہوگی۔ ڈیجیٹل پلیٹ فارمز پر نفرت انگیزمواد کی نگرانی کے لیے اسپیشل یونٹس فعال کر دیے گئے۔