وزیراعظم کے مشیر برائے سیاسی امور راناثنااللہ نے کہا ہے کہ مسلم لیگ ن آزادکشمیر حکومت کا حصہ نہیں ہو گی۔
اسلام آباد میں گفتگو کرتے ہوئے راناثنااللہ نے کہا کہ صدر مملکت کو اپنے فیصلوں پر اعتماد میں لیا ہے تحریک عدم اعتماد میں ن لیگ آزادکشمیر میں پی پی کاساتھ دے گی لیکن ن لیگ نے طے کیا کہ آزادکشمیر کی موجودہ حکومت پر اعتماد نہیں۔
ان کا کہنا تھا کہ آزادکشمیر کی حکومت عوام کو ڈیلیور کرنے میں ناکام رہی ہے۔
وفاقی وزیر احسن اقبال نے میڈیا سے گفتگو میں کہا کہ آزاد کشمیر کا موجودہ سیٹ اپ اپنی ذمہ داریاں پوری کرنے میں ناکام رہا ہے کمیٹی قائم کر کے بحران سے نکلا گیا، عدم اعتماد کے ذریعےسیٹ اپ تبدیل کرنے پر ن لیگ اور پی پی میں اتفاق رائے ہے۔
احسن اقبال نے واضح کیا کہ مسلم لیگ ن آزاد کشمیر میں حکومت کا حصہ نہیں بنےگی، پیپلزپارٹی کو آزادکشمیر میں حکومت سازی کا حق حاصل ہے ن لیگ آزاد کشمیر میں اپوزیشن میں بیٹھ کر اپنا کردار ادا کرے گی۔
پیپلز پارٹی نے آزاد کشمیر میں حکومت سازی کے لیے کوششوں میں تیزی لائی ہے، فاروڈ بلاک، ن لیگ اور پی ٹی آئی کے مزید اراکین سے رابطے کیے جا رہے ہیں۔
پارٹی ذرائع نے بتایا ہے کہ پی ٹی آئی کے 3، فاروڈ بلاک کے 2، اور ن لیگ کے 2 اراکین رابطے میں ہیں، آج مزید 2 یا 3 اراکین کی شمولیت و حمایت کے اعلان کا امکان ہے، جب کہ پیپلز پارٹی کو ایوان کے 32 اراکین کی حمایت حاصل ہو گئی ہے
