سعودی عرب میں مکہ مکرمہ کے نائب گورنر شہزادہ سعود بن مشعل بن عبدالعزیز سے وزیر حج ڈاکٹر توفیق الربیعہ کی ملاقات ہوئی، اس دوران عازمین حج کو فراہم کی جانے والی خدمات اور منصوبوں کا جائزہ لیا گیا۔ جدہ میں ہونے والی پانچویں حج کانفرنس اور نمائش کی حتمی تیاریوں پر بھی تبادلہ خیال کیا گیا
سعودی خبر رساں ادارے کی رپورٹ کے مطابق پانچویں حج کانفرنس اور نمائش میں سرکاری اور نجی شعبے کے نمائندے شرکت کریں گے۔ کانفرنس جدہ سپرڈوم میں منعقد کی جائے گی، جس کا موضوع مکہ سے دنیا تک ہے۔
رپورٹس کے مطابق ان اقدامات کا مقصد خدامات کے نظام کو بہتر بنانا، عازمین اور عمرہ زائرین کے سفر میں سہولت فراہم کرنا اور وژن 2030 کے اہداف کے مطابق عازمین کے تجربے کو بڑھانا ہے۔
سعودی عرب جدہ میں سعودی وزارت حج اور ضیوف الرحمن خدمت پروگرام کے تعاون سے حج کانفرنس اور نمائش کے پانچویں ایڈیشن کا انعقاد کرے گی جو 9 سے 12 نومبر تک جاری رہے گی۔
حج کانفرنس میں 80 سے زیادہ سیشنز اور 60 ورکشاپس کا انعقاد کیا جائے گا، جن میں ماہرین تعلیم، ریسرچر، حج اور سفارتی مشن کے نمائندے شریک ہوں گے جبکہ دنیا بھر سے دو ہزار 400 سے زیادہ ٹرینرز کی شرکت بھی متوقع ہے۔
رپورٹس کے مطابق 137 ملکوں کے 260 نمائش کنندگان حج اور عمرہ کے ایکو سسٹم سے متعلق جدید ٹیکنالوجی اور خدمات کی نمائش کریں گے۔
رواں برس کی کانفرنس میں ٹیکنالوجی، شہری ترقی اور عازمین و زائرین کیلیے خدمات کے حوالے سے نئے معاہدوں پر دستخظ کیے جائیں گے۔
واضح رہے کہ کانفرنس کے چوتھے ایڈیشن میں 137 ممالک سے 220 سے زائد اداروں نے شرکت کی جبکہ وزیٹرز کی تعداد ایک لاکھ 20 ہزار سے زیادہ رہی۔ 670 معاہدوں پر دستخط ہوئے۔
