متحدہ عرب امارات کی پاکستان میں بڑی سرمایہ کاری، فرسٹ ویمن بینک خریدنے میں کامیاب

: متحدہ عرب امارات کی کمپنی فرسٹ ویمن بینک 14.6 ملین ڈالر خریدنے میں کامیاب ہوگئی،   کمپنی 84 فیصد شیئرز خریدے گی۔
تفصیلات کے مطابق متحدہ عرب امارات (یو اے ای) کی حکومت نے پاکستان میں سرمایہ کاری میں گہری دلچسپی کا اظہار کیا ہے۔
ذرائع نے بتایا کہ یو اے ای کی انٹرنیشنل ہولڈنگ کمپنی فرسٹ ویمن بینک کے 84 فیصد شیئرز خریدنے میں کامیاب ہوگئی۔
ذرائع کا کہنا ہے کہ بینک کے 84 فیصد حصص 14.6 ملین ڈالر (تقریباً 4.1 ارب روپے) میں خریدے جائیں گے۔
یہ معاہدہ پاکستان اور متحدہ عرب امارات کے درمیان گورنمنٹ ٹو گورنمنٹ مذاکرات کے نتیجے میں طے پایا، جو کامیابی سے مکمل ہوچکے ہیں۔
ذرائع نے بتایا کہ فرسٹ ویمن بینک کی خریداری کے معاہدے پر آج دستخط کیے جائیں گے۔
اس سے قبل نائب وزیراعظم کی زیر صدارت کابینہ کی خصوصی کمیٹی نے اس معاہدے کی ابتدائی منظوری دی تھی، جبکہ وفاقی کابینہ نے وزیراعظم شہباز شریف کی زیر صدارت اجلاس میں حتمی منظوری دی۔
ذرائع کا کہنا ہے کہ یہ معاہدہ پاکستان میں بینکاری اور سرمایہ کاری کے شعبے میں یو اے ای کے اعتماد کا مظہر ہے، جس سے دوطرفہ معاشی تعلقات کو مزید مضبوطی ملنے کی توقع ہے