شبمن گل نے ایک ہی وار میں ویرات کا ریکارڈ توڑا اور ٹنڈولکر کو پیچھے چھوڑا

بھارتی کپتان شبمن گل نے ایک ہی اننگ کا وار کر کے کرکٹ لیجنڈ ٹنڈولکر کو پیچھے چھوڑا اور ویرات کا ریکارڈ توڑ ڈالا۔
بھارت میں لیجنڈ سچن ٹنڈولکر کو کرکٹ کا دیوتا مانا جاتا ہے جب کہ ٹیسٹ کرکٹ سے ریٹائرمنٹ لینے والے ویرات کوہلی بھی اپنے کیریئر میں کئی ریکارڈ اپنے نام کر چکے ہیں۔ لیکن نوجوان کپتان شبمن گل ان دونوں سے آگے نکل گئے۔
ویسٹ انڈیز کے خلاف سیریز کے دوسرے ٹیسٹ میں شبمن گل نے 129 رنز کی ناقابل شکست اننگ کھیلی۔ یہ بھارتی کپتان کے ٹیسٹ کیریئر کی 10 ویں سنچری تھی۔ لیکن بطور کپتان اس سنچری نے انہیں قد آور بنا دیا۔
یہ شبمن گل کی بطور کپتان ایک سال میں پانچویں سنچری تھی۔ جس کی بدولت وہ ویرات کوہلی کا ریکارڈ توڑنے میں کامیاب رہے۔
اس سے قبل ویرات کوہلی بھی بطور کپتان 18-2017 میں پانچ سنچریاں بنا چکے ہیں۔ تاہم انہوں نے یہ سنچریاں 18 اننگز کھیل کر بنائی تھیں۔ شبمن گل نے ایک کرکٹ کلینڈر ایئر میں 5 سنچریاں صرف 12 اننگ کھیل کر بنائیں اور ویرات کو ریکارڈ توڑ کر اپنے قبضے میں کر لیا۔
سچن ٹنڈولکر نے بطور کپتان 1997 میں چار سنچریاں بنائیں تھیں۔ اس طرح شبمن گل نے لیجنڈری کرکٹر کو بھی پیچھے چھوڑ دیا۔
شبمن گل بطور کپتان 12 اننگز میں 5 سنچریاں بنا کر ٹیسٹ کرکٹ کی تاریخ میں تیز ترین 5 تھری فیگرز اننگ کھیلنے والے تیسرے کپتان بھی بن گئے۔
بطور کپتان سب سے کم اننگز میں سنچری بنانے کا اعزاز سابق انگلش کپتان الیسٹر کُک کے پاس ہے، جنہوں نے 5 سنچریاں بنانے کے لیے صرف 9 اننگز کا سہارا لیا۔ سنیل گواسکر اس فہرست میں دوسرے اور اب شبمن گل تیسرے نمبر پر آ گئے ہیں۔
اس کے علاوہ شبمن گل کی ویسٹ انڈیز کے خلاف 129 رنز کی ناقابل شکست اننگ ہوم گراؤنڈ میں سب سے بڑی اننگ تھی، اس سے قبل آسٹریلیا کے خلاف 2023 میں احمد آباد میں 128 رنز بنائے تھے