فرانسیسی صدر میکرون نے سیبسٹین لیکورنو کو دوبارہ وزیراعظم مقرر کر دیا ہے۔
غیر ملکی میڈیا رپورٹس کے مطابق سیبسٹین لیکورنو نے مالیاتی نظم و ضبط کو بہتر بنانا ترجیح قرار دیتے ہوئے کہا ہے کہ ہمیں فرانس کے سیاسی بحران کو ختم کرنے کی ضرورت ہے۔
چند روز قبل ہی سیبسٹین لیکورنو نے وزیراعظم کے عہدے سے استعفیٰ دیا تھا۔
رپورٹس کے مطابق سیبسٹین لیکورنو کو بڑے پیمانے پر غیر تبدیل شدہ کابینہ کے معاملے پر شدید تنقید کا سامنا تھا۔
واضح رہے کہ صدر میکرون نے گزشتہ ماہ لیکورنو کو وزیراعظم نامزد کیا تھا۔ لیکورنو دو سال سے بھی کم عرصے میں فرانس کے پانچویں وزیر اعظم ہیں۔
دوسری جانب فرانس، برطانیہ، جرمنی نے اقوام متحدہ کی سلامتی کونسل سے ٹرمپ کے غزہ منصوبے کی حمایت کا مطالبہ کیا۔
برطانیہ، فرانس اور جرمنی کے رہنماؤں نے اقوام متحدہ کی سلامتی کونسل پر زور دیا ہے کہ وہ غزہ کے لیے صدر ٹرمپ کے امن منصوبے کی حمایت کرے۔
نام نہاد E3 گروپ نے ایک بیان میں کہا کہ ہم اس بات سے اتفاق کرتے ہیں کہ اقوام متحدہ کی سلامتی کونسل کو اس منصوبے کی مکمل حمایت کرنی چاہیے اور اس کے نفاذ کی حمایت کرنی چاہیے۔
بیان کے مطابق ثالثوں، مصر، قطر اور ترکی کی سفارتی کوششوں اور معاہدے کو محفوظ بنانے کے لیے وسیع تر خطے کی جانب سے حاصل حمایت پر ہم اس معاملے پر صدر ٹرمپ کی قیادت کو خراج تحسین پیش کرتے ہیں۔
