کم آمدنی والے خاندانوں کے لیے گھروں کی تعمیر کے منصوبے کا اعلان

لاہور : کم آمدنی والے خاندانوں کے لیے گھروں کی تعمیر کے منصوبے کا اعلان کردیا گیا، جس کے تحت شہریوں کو آسان اقساط پر گھروں کی ملکیت دی جائے گی۔
تفصیلات کے مطابق پنجاب حکومت نے صوبے بھر میں مستحق اور کم آمدنی والے خاندانوں کے لیے 57 ہزار کم لاگت گھروں کی تعمیر کا منصوبہ شروع کرنے کا اعلان کردیا ہے۔ منصوبے کے تحت شہریوں کو آسان اقساط پر گھروں کی ملکیت دی جائے گی۔
ترجمان محکمہ ہاؤسنگ پنجاب نے بتایا کہ یہ منصوبہ معیاری اور سستے مکانات کی فراہمی کے لیے شروع کیا گیا ہے، جو محکمہ ہاؤسنگ کی نگرانی میں مکمل کیا جائے گا۔
پہلے مرحلے میں پنجاب کے 41 منتخب مقامات پر 20 ہزار گھروں کی تعمیر شروع کی جائے گی، جب کہ اس مقصد کے لیے سرکاری اراضی پنجاب ہاؤسنگ اینڈ ٹاؤن پلاننگ ایجنسی کے حوالے کردی گئی ہے۔
منصوبے کے تحت 24 اضلاع میں مختلف ڈیزائن اور سائز کے مکانات تعمیر کیے جائیں گے جبکہ 16 اضلاع میں 250 اسکوائر فٹ کے سنگل اسٹوری یونٹس، 5 اضلاع میں 530 اسکوائر فٹ کے تین منزلہ، اور 3 اضلاع میں 550 اسکوائر فٹ کے چار منزلہ فلیٹس تعمیر ہوں گے۔
محکمہ ہاؤسنگ نے مزید بتایا کہ یہ پانچ سالہ منصوبہ ماحول دوست طرزِ زندگی کے لیے شمسی توانائی کے نظام اور بارش کے پانی کو محفوظ کرنے کی ٹیکنالوجی سے مزین ہوگا۔
یہ منصوبہ عالمی بینک اور نجی شعبے کے اشتراک سے مکمل کیا جائے گا، تاکہ بین الاقوامی تعمیراتی معیار، سہولیات کی فراہمی اور مؤثر نگرانی کو یقینی بنایا جاسکے۔
ترجمان کے مطابق اسکیم کے ہر مرحلے میں معیار پر سختی سے نظر رکھی جائے گی، جب کہ مکینوں کو بنیادی سہولیات کے ساتھ بہتر رہائشی ماحول فراہم کیا جائے گا۔