ڈونلڈ ٹرمپ انتظامیہ نے نیشنل گارڈ ایلِ نوائے بھیج دیے

ریاستی انتظامیہ کی مخالفت اور مقدمات دائر کیے جانے کے باوجود ڈونلڈ ٹرمپ انتظامیہ نے نیشنل گارڈ ایلِ نوائے بھیج دیے۔ ٹیکساس سے آئے اہلکاروں نے پوزیشن سنبھال لی۔
غیر ملکی ذرائع ابلاغ کے مطابق شکاگو میں جرائم کی شرح کم ہونے کے باوجود امریکی صدر کا دعویٰ ہے کہ ریاست ایلِ نوائے کی صورتحال افغانستان سے بھی بدتر ہے۔
ٹرمپ انتظامیہ مختلف ریاستوں میں غیر قانونی طور پر مقیم افراد کیخلاف سخت کریک ڈاؤن کررہی ہے تاہم ڈیموکریٹک ریاست میں نیشنل گارڈ کی تعیناتی کا سبب نہیں بتایا گیا۔
امریکا میں ڈیڑھ سو برس سے نافذ قانون کے تحت فوج کو داخلی قوانین لاگو کرنے کی اجازت نہیں تاہم صدر ٹرمپ کا کہنا ہے کہ وہ بغاوت ایکٹ نافذ کریں گے۔
اس سے قبل امریکی صدر نے اعلان کیا کہ یکم نومبر سے تمام غیرملکی ٹرکوں پر 25 فیصد ٹیرف عائد ہو گا اور دیگر ممالک سے آنے والے تمام ٹرک اب 25فیصد ٹیرف کے زمرے میں آئیں گے۔
ٹروتھ سوشل پر ایک پوسٹ میں ٹرمپ نے کہا کہ یکم نومبر 2025 سے، دوسرے ممالک سے امریکا آنے والے تمام میڈیم اور ہیوی ڈیوٹی ٹرکوں پر 25% کی شرح سے ٹیرف لگے گا۔
دراصل ٹرمپ نے پچھلے مہینے کہا تھا کہ ہیوی ڈیوٹی ٹرک لیوی 1 اکتوبر سے شروع ہو جائیں گے لیکن یہ ٹائم لائن اس وقت آگے بڑھ گئی جب حکام نے اثرات کے بارے میں فکر مند کمپنیوں کی اپیلیں سنیں۔
روس نے یوکرین کے بڑے علاقے پر قبضہ کرلیا
ڈونلڈ ٹرمپ کے اعلان کا تعلق اپریل میں امریکی محکمہ تجارت کی جانب سے بھاری ٹرکوں کی درآمدات کے حوالے سے شروع کی گئی تحقیقات سے ہے۔ تجارتی توسیعی ایکٹ کے سیکشن 232 کے تحت کی جانے والی یہ تحقیقات قومی سلامتی کے لیے اہم سمجھی جانے والی اشیا پر درآمدی ٹیکس کے نفاذ کی اجازت دیتی ہے۔