امریکا نے بین الاقوامی سمندر میں منشیات لے جانے والی ایک کشتی کو میزائل سے اڑا دیا، اس حملے کی ہولناک ویڈیو بھی جاری کی گئی ہے۔
امریکی وزیر جنگ پیٹ ہیگسیتھ نے ایکس پر ایک ویڈیو جاری کی ہے، جس میں وینزویلا کے ساحل کے قریب بین الاقوامی پانیوں میں تیز رفتاری سے جانے والی ایک کشتی کو اچانک میزائل آ لگتا ہے اور کشتی تباہ ہو جاتی ہے۔
پیٹ ہیگسیتھ نے ایکس پر پوسٹ میں بتایا ’’آج صبح صدر ٹرمپ کے حکم پر میں نے یو ایس ساؤتھ کمانڈ کے علاقے میں نامزد دہشت گرد تنظیموں سے منسلک منشیات کی اسمگلنگ کرنے والے ایک جہاز پر ایک جان لیوا حملے کی ہدایت کی۔‘‘
وزیر جنگ کے مطابق اس حملے میں جہاز پر سوار 4 نارکو دہشتگرد ہلاک ہوئے، اور اس کارروائی کے دوران کسی بھی امریکی فورس کو نقصان نہیں پہنچا۔ ان کا کہنا تھا کہ یہ حملہ وینزویلا کے ساحل کے قریب بین الاقوامی پانیوں میں اس وقت کیا گیا جب وہ جہاز بڑی مقدار میں منشیات منتقل کر رہا تھا، جو امریکا پہنچ کر ہمارے لوگوں کے لیے نقصان پہنچاتا۔
انھوں نے دعویٰ کیا کہ خفیہ اطلاعات نے بغیر کسی شک کے تصدیق کی کہ یہ جہاز منشیات کی اسمگلنگ کر رہا تھا، جہاز پر سوار افراد نارکو دہشتگرد تھے، اور وہ ایک معروف منشیات اسمگلنگ کے روٹ پر آپریشن کر رہے تھے۔ انھوں نے کہا کہ یہ حملے جاری رہیں گے جب تک امریکی عوام پر منشیات کے حملے ختم نہیں ہو جاتے
