کپتان فاطمہ ثنا: بھارتی ٹیم کے ساتھ ماضی کی اچھی یادیں وابستہ ہیں

کولمبو: پاکستانی ویمنز کرکٹ ٹیم کی کپتان فاطمہ ثنا کا کہنا ہے کہ بھارتی ٹیم کے ساتھ ماضی کی اچھی یادیں وابستہ ہیں، ہماری توجہ صرف کرکٹ پر ہے، امید ہے اگلے میچز میں بہتر پرفارمنس دیں گے۔
کولمبو میں آئی سی سی ویمنز ورلڈکپ میں پاک بھارت میچ سے قبل پری میچ پریس کانفرنس کے دوران پاکستانی ویمنز کرکٹ ٹیم کی کپتان فاطمہ ثنا کا کہنا تھا کہ کوچز نے کہا ہے خود پر بھروسہ رکھیں، ایک میچ ہارنے سے کچھ نہیں ہوتا، ابھی ٹورنامنٹ باقی ہے۔
فاطمہ ثنا کا کہنا تھا کہ ہمارا پورا فوکس کرکٹ پر ہے، امید ہے اگلے میچز میں بہتر پرفارمنس دیں گے، ماضی میں منیبہ علی نے پرفارم کیا ہے، ایک دو میچز سے پلیئر کو باہر نہیں کیا جا سکتا۔
انہوں نے کہا کہ سینئرپلیئرز کی سپورٹ میرے لیے بہت اہم ہے، اگر غلطی ہو تو سینئر پلیئرز سپورٹ کرتے ہیں، ہم اچھی کرکٹ کھیلیں گے تو ہمارے لیے فائدہ ہے۔
پاکستانی کپتان نے کہا کہ کوالیفائر میں ہم نے اچھا کھیلا تھا، وہی پرفارمنس دہرانا ہوگی، ہمارے پاس اتنی پاور ہے کہ ہم کسی بھی ٹیم کو ہرا سکتے ہیں۔
واضح رہے کہ گزشتہ روز آئی سی سی ویمنز ورلڈ کپ میں انگلینڈ نے جنوبی افریقا کو 10 وکٹوں سے شکست دے دی۔
گوہاٹی میں کھیلے گئے میچ میں جنوبی افریقا کی جانب سے دیا جانے والا 70 رنز کا ہدف انگلش ٹیم نے بغیر کسی نقصان کے 15ویں اوور میں حاصل کرلیا۔