ڈاؤ یونیورسٹی کے زیرِ انتظام اوجھا کیمپس میں پاکستان کا پہلا مفت پلمونری ری ہیب سینٹر قائم کر دیا گیا جس کا رسمی افتتاح وائس چانسلر پروفیسر ڈاکٹر نازلی حسین نے اوجھا انسٹی ٹیوٹ آف چیسٹ ڈیزیز میں کیا۔
’ڈاکٹر سید عاشق حسین ری ہیب لی ٹیشن سینٹر‘ پاکستان میں اپنی نوعیت کا پہلا مفت سینٹر ہے جس کا نام اوجھا انسٹیٹیوٹ آف چیسٹ ڈیزیز کے سابق سربراہ ڈاکٹر سید عاشق حسین کی یاد میں رکھا گیا ہے۔
درایں اثنا، وائس چانسلر پروفیسر نازلی حسین نے اوجھا انسٹیٹیوٹ آف چیسٹ ڈیزیز میں آئی وی ڈائی لیوشن سینٹر کا بھی افتتاح کیا، اس موقع پر اوجھا انسٹی ٹیوٹ آف چیسٹ ڈیزیز کے ڈائریکٹر پروفیسر افتخار احمد، ڈپٹی ڈائریکٹر ڈاکٹر مرتضیٰ سوہو، ڈاکٹر نیاز سومرو، ڈاکٹر فیصل اسد، ڈاکٹر فیصل فیاض زبیری اور دیگر بھی موجود تھے۔
پروفیسر نازلی حسین نے اس موقع پر کہا کہ ڈاؤ یونیورسٹی کی کوشش ہے بہترین طبی سہولتیں مریضوں تک پہنچائی جائیں، آج دو نئے مراکز کی فعالیت اسی سمت میں پیش رفت ہے۔
پروفیسر افتخار احمد نے کہا کہ اوجھا انسٹیٹیوٹ آف چیسٹ ڈیزیز امراض سینہ کے مریضوں کو تشخیص، علاج اور دواؤں سمیت تمام سہولتیں مفت فراہم کرتا ہے، یہاں پر ٹی بی کے مریضوں کیلیے آئی سی کی سہولت مفت میں دستیاب ہے جبکہ ایسی سہولت کہیں اور دستیاب ہی نہیں ہے
