تفصیلات کے مطابق بالائی علاقوں میں موسمِ سرما نے دستک دے دی ہے، مانسہرہ کے سیاحتی مقامات بیسر اور نوری ٹاپ سمیت بابوسر ٹاپ اور اس کے اطراف میں برفباری ہوئی۔
جس کے بعد علاقے میں موسم نہایت سرد ہوگیا اور درجہ حرارت نقطۂ انجماد سے نیچے گر گیا۔
برفباری کے باعث مقامی افراد اور سیاحوں نے دلفریب مناظر سے لطف اٹھایا تاہم بابوسر-چلاس روڈ عارضی طور پر ٹریفک کے لیے بند کر دی گئی ہے۔
انتظامیہ نے شہریوں کو ہدایت کی ہے کہ خراب موسم کے دوران غیر ضروری سفر سے گریز کریں۔
دوسری جانب ڈی جی پی ڈی ایم اے پنجاب عرفان کاٹھیا کے مطابق آئندہ چند روز میں مزید بارشوں کا امکان ہے، جس کے باعث بالائی علاقوں کے ندی نالوں میں طغیانی کا خدشہ بھی ہے۔
یاد رہے موسمیاتی ماہرین نے خبردار کیا ہے کہ پاکستان رواں سال کئی دہائیوں کی سب سے شدید سردی کا سامنا کر سکتا ہے۔
ماہرین کا کہنا ہے کہ یہ غیر معمولی سردی نایاب موسمیاتی رجحان “لا نینا” (La Nina) کے باعث ہوگی۔
“لا نینا” کے دوران عالمی سطح پر مختلف خطوں میں انتہائی موسمی تبدیلیاں رونما ہوتی ہیں۔ آسٹریلیا میں سیلاب، مشرقی افریقہ میں قحط اور شمالی امریکا میں سخت سردیوں کے واقعات ریکارڈ کیے جا چکے ہیں۔
پاکستان میں یہ رجحان شمالی علاقوں میں شدید برفباری، یخ بستہ ہواؤں اور میدانی علاقوں میں طویل کہر کا سبب بن سکتا ہے
