لندن – برطانیہ اور پرتگال نے کہا ھے کہ وہ فلسطین کو ریاست تسلیم کرنے کا اعلان کریں گے۔

برطانوی میڈیا کے مطابق وزیر اعظم کیئر اسٹارمر فلسطین کو بطور ریاست تسلیم کرنے کا اعلان کریں گے، اس کے ساتھ حماس پر بھی پابندیاں عائدی کی جائیں گی۔
توقع کی جا رہی ہے کہ نیویارک میں اقوام متحدہ کی جنرل اسمبلی کے ایک اہم ہفتے کے آغاز سے قبل آج اتوار کو برطانیہ اور پرتگال فلسطینی ریاست کو تسلیم کرنے کا اعلان کریں گے، جنرل اسمبلی میں متعدد ممالک ایسا ہی قدم اٹھانے جا رہے ہیں تاکہ غزہ کے معاملے پر اسرائیل پر دباؤ ڈالا جا سکے۔
برطانوی وزیر اعظم نے جولائی میں اسرائیلی حکومت سے غزہ کی خوف ناک صورت حال ختم کرنے کا مطالبہ کیا تھا۔ اندازا ہے کہ آنے والے دنوں میں تقریباً 10 ممالک فلسطین کو ایک ریاست کے طور پر تسلیم کریں گے۔
برطانوی ذرائع ابلاغ نے رپورٹ کیا ہے کہ وزیرِاعظم کیئر اسٹارمر اتوار کے روز پالیسی میں تبدیلی کا اعلان کریں گے، حالاں کہ اسرائیل کی جانب سے شدید مخالفت کی جا رہی ہے۔ اسٹارمر نے جولائی میں کہا تھا کہ اگر اسرائیل نے اقوام متحدہ کی جنرل اسمبلی کے اجلاس سے پہلے حماس کے ساتھ جنگ بندی کی جانب ٹھوس اقدامات نہ کیے، تو برطانیہ فلسطینی ریاست کو باضابطہ طور پر تسلیم کر لے گا۔
لیبر پارٹی کے رہنما نے اس وقت کہا تھا کہ یہ اقدام دو ریاستی حل کے لیے سب سے زیادہ مؤثر لمحے میں ایک حقیقی امن عمل میں معاون کردار ادا کرے گا۔