الجزیرہ کے مطابق سینئر قطری عہدیدار نے صدر عالمی فوجداری عدالت سے ملاقات کی اور دوحا پر اسرائیلی حملے سے آگاہ کیا۔
قطر نے اسرائیل کے خلاف قانونی کارروائی شروع کرنے کا اعلان بھی کیا ہے۔
چیف مذاکرات کار محمد الخلیفی نے ہیگ میں عالمی فوجداری عدالت کے جج سے ملاقات کے بعد کہا کہ قطر پر اسرائیلی حملے کا قانونی جواب دینا لازم ہے، اسرائیلی حملہ عالمی قوانین کی سنگین خلاف ورزی ہے۔
قطر نے دوٹوک کہا کہ اسرائیل کے غیرقانونی اقدامات پر خاموش نہیں بیٹھیں گے۔
قطر میں ہونے والے عرب اسلامی ہنگامی سربراہی اجلاس کا مشترکہ اعلامیہ جاری کر دیا گیا۔
مسلم ممالک کا قطر سے اظہاریکجہتی اور جوابی اقدامات کی حمایت کا اعلان
اعلامیہ کے مطابق اسرائیل کی قطر پر بربریت خطے میں امن کے امکانات کو تباہ کرتی ہے قطر پر اسرائیل کے بزدلانہ اور غیرقانونی حملے کی شدید الفاظ میں مذمت کرتے ہیں۔
اجلاس کے شرکا نے قطر کے ساتھ مکمل اظہاریکجہتی اور جوابی اقدامات کی حمایت کرتے ہوئے واضح کیا کہ غیرجانبدار ثالثی مرکز پر حملہ عالمی امن کوششوں کو نقصان پہنچاتا ہے، اسرائیلی بزدلانہ حملے سے نمٹنے میں قطر کے مہذب اور دانشمندانہ رویے کو سراہتے ہیں۔
اعلامیہ کے مطابق غزہ جنگ رکوانے کےلئے قطر، مصر اور امریکا کی ثالثی کی کوششوں کی حمایت کرتے ہیں، قطر کے تعمیری اور مؤثر ثالثی کردار اور سلامتی قائم کرنےکی کوششوں کو سراہاتے ہیں۔
شرکا نے دوٹوک پیغام دیا کہ کسی بھی جواز کے تحت اسرائیلی جارحیت کو تسلیم نہیں کیا جا سکتا اسرائیل کی قطر کو دوبارہ نشانہ بنانےکی دھمکیوں کو مکمل طور پر مسترد کرتے ہیں
