وزیراعظم شہباز شریف دورہ سعودی عرب مکمل کرکے لندن روانہ

تفصیلات کے مطابق وزیراعظم شہباز شریف سعودی عرب کا دورہ مکمل کرکے ریاض سے لندن روانہ ہوگئے۔
ریاض کے نائب گورنر محمد بن عبد الرحمن بن عبد العزیزنے ایئرپورٹ پروزیراعظم کو الوداع کیا ، وزیراعظم نے سعودی ولی عہد شہزادہ محمد بن سلمان بن عبدالعزیز آل سعود کی دعوت پر سرکاری دورہ کیا تھا۔
وزیراعظم برطانیہ میں دو روز قیام کریں گے، اس دوران ان کی برطانوی اعلیٰ حکام سے اہم ملاقات متوقع ہے۔
سرکاری شیڈول کے تحت وزیراعظم 21 ستمبر کو برطانیہ سے امریکا روانہ ہوں گے، جہاں وہ 22 ستمبر کو فلسطین پر سربراہ کانفرنس میں شرکت کریں گے۔ شہباز شریف نیویارک میں اقوام متحدہ کی جنرل اسمبلی کے اجلاس میں بھی شریک ہوں گے جبکہ جنرل اسمبلی سے ان کا خطاب 26 ستمبر کو طے ہے۔
یاد رہے ریاض میں قیام کے دوران وزیراعظم شہباز شریف نے سعودی ولی عہد شہزادہ محمد بن سلمان سے ملاقات کی، ملاقات میں فیلڈ مارشل عاصم منیر، نائب وزیراعظم اسحاق ڈار اور دیگر وزرا بھی شریک تھے۔
اس موقع پر دوطرفہ تعلقات، سرمایہ کاری اور دفاعی تعاون پر تبادلہ خیال کیا گیا۔ سعودی ولی عہد نے پاکستان کو بھرپور تعاون کی یقین دہانی کرائی۔
قصر یمامہ پہنچنے پر شہزادہ محمد بن سلمان نے وزیراعظم کا پرتپاک استقبال کیا جبکہ شاہی دیوان میں وزیراعظم کے اعزاز میں استقبالیہ تقریب بھی منعقد ہوئی۔ اس موقع پر سعودی نیشنل گارڈز نے وزیراعظم کو گارڈ آف آنر پیش کیا