ایم ڈی کیٹ امتحان سے متعلق اہم خبر آگئی

قومی اسمبلی کی قائمہ کمیٹی کے چیئرمین ڈاکٹر مہیش کمار قومی نے کہا کہ پنجاب اور سندھ میں سیلابی صورتحال ہے، سیلاب میں لاکھوں لوگ بے گھر ہو چکے ہیں، سیلاب میں بے گھر ہونے والے طلبا ایم ڈی کیٹ کیسے دے گا؟
قائمہ کمیٹی کے چیئرمین ڈاکٹر مہیش کمار نے وزیر صحت کو ایم ڈی کیٹ موخر کرنے کی اپیل کرتے ہوئے انسانی ہمدردی کی بنیاد  پر غور کرنے کو کہا، ڈاکٹر مہیش کمار نے کہا کہ سیلاب سے متاثرہ طلبا ایم ڈی کیٹ کی تیاری کیسے کریں گے، کمیٹی کے بیشتر اراکین نے ایم ڈی کیٹ امتحان موخر کرنے کے مطالبے کی حمایت کی۔
چئیرمین کمیٹی کا کہنا تھا کہ ایم ڈی کیٹ موخر کرنے کے حوالے سے طلبا کی شکایات موصول ہو رہی ہیں، دوسری جانب وفاقی وزیر صحت مصطفی کمال نے کہا کہ ایم ڈی کیٹ امتحان کی تاریخ میں توسیع کر دی گئی ہے۔
وفاقی وزیر صحت مصطفی کمال نے بتایا کہ ایم ڈی کیٹ 5 کے بجائے 25 اکتوبر کو ہو گا، ایم ڈی کیٹ امتحان کے انعقاد پر صوبائی جامعات سے مشاورت کی ہے، امتحان کا انعقاد صوبائی جامعات کی ذمہ داری ہے اب ایم ڈی کیٹ ٹیسٹ کو موخر کرنے سے طلبا کو مالی نقصان ہو گا، صوبائی جامعات سیلاب کے باوجود ایم ڈی کیٹ لینے کیلئے تیار ہیں۔
جس پر چئیرمین کمیٹی نے کہا کہ ایم ڈی کیٹ دینے والے طلبا سیلاب میں فیس کیسے جمع کرائیں گے، سیلاب زدہ علاقوں میں کثیر تعداد میں بینک بند پڑے ہیں۔
دوسری جانب صدر پی ایم ڈی سی پروفیسر رضوان تاج نے کہا کہ ایم ڈی کیٹ پر فریقین سے مشاورت ہوئی ہے، فریقین کو ایم ڈی کیٹ امتحان لینے میں مسئلہ نہیں ہے، صوبوں، فریقین سے مشاورت کے بعد وزیر صحت سے ملاقات کی تھی۔
وزیر صحت مصطفی کمال نے مزید کہا کہ ایم ڈی کیٹ کی تاریخ میں مزید توسیع نہیں کر رہے ہیں، اگر مزید بارشوں سے حالات خراب ہوئے تو ایم ڈی کیٹ کی تاریخ میں توسیع پر غور کیا جائے گا۔