عامر خان بالی وڈ اداکاروں کے نامناسب رویے پر سخت برہم

ممبئی (15 ستمبر 2025): بالی وڈ میں ’مسٹر پرفیکشنٹ‘ کے نام سے منفرد شناخت رکھنے والے اسٹار عامر خان بالی وڈ اداکاروں کے نامناسب رویے پر سخت برہم ہیں۔
عامر خان نے حالیہ انٹرویو میں ایک سچائی کا انکشاف کیا اور انہوں نے اداکاروں کو اُن کے ذاتی عملے کیلیے پروڈیوسرز سے اخراجات مانگنے پر تنقید کا نشانہ بنایا۔
انہوں نے اپنے ابتدائی دنوں کو یاد کیا اور ان کا موازنہ موجودہ دور سے کیا جہاں آج اداکار پروڈیوسرز سے اپنی وینٹی وین میں لائیو کچن کے اخراجات ادا کرنے کا مطالبہ کر رہے ہیں۔
انہوں نے اسے رویے شرمناک قرار دیا اور زور دیا کہ یہ اداکار کروڑوں روپے کما رہے ہیں لیکن پھر بھی سیٹ پر اپنی ذاتی عملے کے اخراجات ادا کرنے سے قاصر ہیں جس کی وجہ سے پروڈیوسر کو بل ادا کرنا پڑتا ہے۔
انٹرویو میں عامر خان نے کہا کہ اداکاروں کو عزت ملنی چاہیے لیکن اس حد تک نہیں کہ وہ پروڈیوسرز کو پریشان کرنا شروع کر دیں، پروڈیوسرز اداکاروں کے ڈرائیور اور سیٹ پر اس کے ذاتی عملے کے اخراجات ادا کرتے ہیں مجھے یہ عمل بہت عجیب لگاتا ہے، میں نے سوچا ڈرائیور اور ذاتی عملہ میرے لیے کام کر رہے ہیں پروڈیوسرز ان کے اخراجات کیوں ادا کر رہے ہیں؟ اگر پروڈیوسر میرے ذاتی عملے کو تنخواہ دے رہا ہے تو کیا وہ میرے بچوں کی اسکول فیس بھی ادا کرے گا؟
عامر خان نے واضح کیا کہ پروڈیوسر کو صرف فلم سے براہ راست متعلقہ اخراجات جیسے میک اپ، ملبوسات اور بالوں کے اخراجات برداشت کرنے چاہئیں، ذاتی عملہ فلم میں کیا حصہ ڈالتا ہے؟ ان کی تنخواہ دینا اداکار کی ذمہ داری ہے خاص طور پر جب میں اچھا کما رہا ہوں۔
مسٹر پرفیکشنٹ نے بتایا کہ یہ مسئلہ وقت کے ساتھ پیدا ہوا ہے اور انکشاف کیا کہ اب ستارے پروڈیوسرز سے اپنے ٹرینرز اور باورچیوں کے اخراجات بھی ادا کرنے کا مطالبہ کر رہے ہیں، انہوں نے سیٹ پر لائیو کچن نصب کیا ہے اور توقع کرتے ہیں کہ پروڈیوسر اس کے اخراجات برداشت کرے۔
انہوں نے اپنی بات کو مزید واضح کرتے ہوئے کہا کہ وہ اداکاروں کے ان آسائشوں سے لطف اندوز ہونے کے خلاف نہیں ہیں لیکن پروڈیوسرز سے ان کے اخراجات مانگنا جائز نہیں ہے۔
’یہ اداکار کروڑوں روپے کما رہے ہیں اور پھر بھی اپنی ضروریات کے اخراجات ادا کرنے کے قابل نہیں ہیں؟ مجھے یہ بہت عجیب لگتا ہے۔ یہ انڈسٹری کیلیے بہت افسوسناک اور نقصان دہ ہے، میں سختی سے کہتا ہوں کہ یہ شرم کی بات ہے کہ آج بھی کچھ اداکار اپنے پروڈیوسرز اور فلمسازوں کے ساتھ بہت ناانصافی کر رہے ہیں۔‘
واضح رہے کہ عامر خود بھی ایک پروڈیوسر ہیں جو ’عامر خان پروڈکشنز‘ کے مالک ہیں اور ان کے بینر تلے کئی شاندار فلمیں بنائی ہیں جن میں لگان، تارے زمین پر، تلاش اور دنگل شامل ہیں۔