نیویارک (15 ستمبر 2025): امریکی میڈیا کا کہنا ہے کہ اسرائیل کی جانب سے غزہ پر زمینی حملہ چند دنوں میں متوقع ہے۔
تفصیلات کے مطابق امریکی ٹی وی چینل سی این این نے رپورٹ کیا ہے کہ دو اسرائیلی حکام نے اتوار کو بتایا کہ غزہ شہر پر اسرائیلی زمینی حملہ آئندہ چند دنوں میں شروع ہو سکتا ہے۔
ایک ذریعے کے حوالے سے امریکی ٹی وی کا کہنا تھا کہ یہ حملہ بہت قریب ہے، جب کہ دوسرے ذریعے نے بتایا کہ یہ حملہ پیر کو بھی شروع ہو سکتا ہے۔
خیال رہے کہ زمینی حملے سے قبل اسرائیلی فوج نے غزہ میں بلند و بالا رہائشی و دیگر اہم عمارتوں کو تیزی سے تباہ کرنا شروع کر دیا ہے جن کے بارے میں اس کا دعویٰ ہے کہ حماس انھیں استعمال کرتی ہے۔ اقوام متحدہ کی ریلیف اینڈ ورکس کے کمشنر جنرل نے اتوار کو ایک بیان میں کہا کہ گزشتہ 4 دنوں میں غزہ شہر میں کم از کم 10 اقوام متحدہ کی عمارتوں کو نشانہ بنایا گیا ہے۔
غزہ شہر پر قبضے کے اسرائیلی منصوبے کی منظوری رواں برس اگست کے اوائل میں دی گئی تھی۔ ابتدائی منصوبے کے مطابق اس کارروائی میں کئی ماہ لگنے تھے، جس کی ابتدا غزہ اور اس کے اطراف سے 10 لاکھ سے زائد فلسطینیوں کے جبری انخلا سے ہونا تھی، مگر وزیر اعظم نیتن یاہو نے فوج کو حکم دیا کہ اس منصوبے کے شیڈول کو مختصر کیا جائے۔
تاہم دوسری طرف اس منصوبے کو نہ صرف عالمی سطح پر مذمت کا سامنا ہے بلکہ اسرائیل کے اندر بھی مخالفت بڑھ رہی ہے۔ اسرائیلی فوج کے سربراہ ایال زامیر نے انتباہ کیا ہے کہ یہ کارروائی باقی ماندہ قیدیوں کو خطرے میں ڈال دے گی، فوجیوں کی جانوں کو شدید خطرہ لاحق ہوگا اور غزہ میں انسانی بحران مزید سنگین ہو جائے گا۔
