سیکیورٹی فورسز کے انٹیلیجنس بیسڈ آپریشن میں 4 دہشت گرد ہلاک

راولپنڈی: مستونگ میں سیکیورٹی فورسز کے انٹیلیجنس بیسڈ آپریشن میں 4 دہشت گرد ہلاک ہوگئے۔
پاک فوج کے شعبہ تعلقات عامہ (آئی ایس پی آر) کے مطابق مستونگ میں مارے گئے فتنہ الہندوستان کے دہشتگرد متعدد کارروائیوں میں ملوث تھے۔
ترجمان پاک فوج کا کہنا ہے کہ سیکیورٹی فورسز نے موثر کارروائی میں ہتھیار اور دھماکا خیز مواد برآمد کیے ہیں۔
آئی ایس پی آر کا کہنا ہے کہ سیکیورٹی فورسز کا ممکنہ دہشت گردوں کے خاتمے کے لیے کلیئرنس آپریشن جاری ہے، فورسز دہشت گرد عناصر کو قانون کے کٹہرے میں لانے کے لیے پرعزم ہیں۔
واضح رہے کہ گزشتہ روز سیکیورٹی فورسز نے خیبرپختونخوا کے اضلاع مہمند، شمالی وزیرستان اور بنوں میں کامیاب انٹیلی جنس بیسڈ کارروائیوں کے دوران 19 بھارتی حمایت یافتہ خوارج کو ہلاک کر دیا۔
یہ پڑھیں: خیبر پختونخوا میں سیکیورٹی فورسز کی کامیاب کارروائیاں، فتنہ الخوارج کے 19 دہشت گرد ہلاک
آئی ایس پی آر کا کہنا تھا کہ یہ تمام دہشت گرد بھارتی سرپرست گروہ ’’فتنہ الخوارج‘‘ سے تعلق رکھتے تھے اور مقامی آبادی سمیت مختلف دہشت گردانہ سرگرمیوں میں ملوث تھے۔
ترجمان پاک فوج نے کہا کہ 9 اور 10 ستمبر کو تین الگ الگ کارروائیاں کی گئیں، مہمند کے علاقے گلونو میں آپریشن کے دوران سیکیورٹی فورسز نے دشمن کے ٹھکانے کو نشانہ بنایا، جس کے نتیجے میں 14 خوارج مارے گئے۔
اسی طرح شمالی وزیرستان کے دتہ خیل میں کارروائی کے دوران فائرنگ کے تبادلے میں 4 دہشت گرد ہلاک ہوئے، جبکہ بنوں میں ایک خارجی کو جہنم واصل کیا گیا۔ کارروائیوں میں دہشت گردوں کے قبضے سے بھاری مقدار میں اسلحہ اور گولہ بارود بھی برآمد ہوا۔