ایشیا کپ 2025 میں پاک بھارت میچ سے قبل بھارتیوں کی جانب سے بچگانہ اور نامناسب حرکتوں کا سلسلہ جاری ہے، پریتی زنٹا پاک بھارت میچ سے قبل اوچھی حرکت کرکے تنقید کی زد میں آگئیں۔
رپورٹس کے مطابق سوشل میڈیا پر ایک پوسٹ میں انڈین پریمیئر لیگ (آئی پی ایل) میں اداکارہ پریتی زنٹا کی فرنچائز کنگز الیون پنجاب نے اسپورٹس مین اسپرٹ کی شدید خلاف ورزی کی، انہوں نے بھارت کے خلاف میچ کے شیڈول والے پوسٹر سے پاکستان کا لوگو حذف کردیا۔
اپنی سوشل میڈیا پوسٹ میں پنجاب کنگز نے پاکستان کے لوگو کی جگہ ایک سفید ڈبہ لگا دیا جبکہ بھارتی کرکٹ بورڈ کا لوگو واضح طور پر دیکھا جاسکتا ہے۔
دنیا بھر کے کرکٹ فینز نے اس غیر اخلاقی اقدام پر سخت ردِعمل ظاہر کرتے ہوئے پریتی کو آڑے ہاتھوں لے لیا، اس حرکت پر بھارتی صارفین نے بھی شدید ردعمل کا اظہار کرتے ہوئے اس پوسٹ کو احمقانہ اور اوچھی حرکت قرار دی۔
پنجاب کنگز نے اپنی پوسٹ پر اس سخت دباؤ اور تنقید کے بعد کمنٹس کا سیکشن ہی بند کر دیا، تاہم کرکٹ شائقین اس حرکت کو کھیل کی روح کے منافی اور کھیل کے وقار کو مجروح کرنے کے مترادف قرار دے رہے ہیں۔
واضح رہے کہ ایشیا کپ 2025 میں پاک بھارت ٹاکرا 14 ستمبر کو دبئی میں شیڈول ہے۔ اگر دونوں ٹیمیں سپر فور مرحلے میں جگہ بنانے میں کامیاب رہیں تو ان کا دوسرا میچ 21 ستمبر کو ہوگا۔
ایشیا کپ 2025، پاکستان پہلا میچ آج عمان کیخلاف کھیلے گا
رپورٹس کے مطابق اگر پاکستان اور بھارت فائنل تک پہنچنے میں کامیاب ہوجاتے ہیں تو 28 ستمبر کو ایشیا کپ میں دونوں حریفوں کا تیسرا میچ بھی ہوسکتا ہے
