فیفا ورلڈ کپ 2026 کے دوران متعدد شائقین کے مبینہ طور پر بغیر ٹکٹ اسٹیڈیم میں داخل ہونے کے بعد سیکیورٹی انتظامات پر سوالات اٹھنے لگے ہیں۔
برطانوی میڈیا رپورٹس کے مطابق ڈیلاس میں انگلینڈ اور کروشیا کے درمیان کھیلے گئے میچ کے دوران کئی افراد ٹکٹ اور سیکیورٹی چیک کے بغیر اسٹیڈیم میں داخل ہونے میں کامیاب رہے۔
عینی شاہدین کا کہنا ہے کہ ٹکٹ چیکنگ کے مقامات پر موجود خامیوں کے باعث متعدد افراد آسانی سے اندر داخل ہوتے رہے۔ ایک انگلش شائق نے بتایا کہ داخلی راستوں پر نگرانی مؤثر نہیں تھی اور بعض افراد بغیر ٹکٹ اسکین کرائے ہی اسٹیڈیم میں پہنچ گئے۔
شائقین کے مطابق کچھ افراد نے رکاوٹیں عبور کرکے اندر جانے کی کوشش کی جبکہ سیکیورٹی عملہ انہیں روکنے میں ناکام رہا۔
یہ صورتحال اس وقت سامنے آئی جب میچ کے لیے غیر معمولی سیکیورٹی انتظامات اور خصوصی تربیت یافتہ اہلکاروں کی تعیناتی کا دعویٰ کیا گیا تھا۔
دوسری جانب فیفا کے ترجمان نے کہا ہے کہ تاحال بغیر ٹکٹ کسی شخص کے اسٹیڈیم میں داخل ہونے کے شواہد نہیں ملے، جبکہ پولیس حکام نے بھی واقعے سے لاعلمی کا اظہار کیا ہے۔
ادھر مہنگے داموں ٹکٹ خریدنے والے شائقین نے اس صورتحال پر شدید تشویش اور ناراضی کا اظہار کیا ہے۔
