وفاقی حکومت نے پاسپورٹ نظام کو مکمل طور پر آن لائن کرنے کا فیصلہ کر لیا ہے، جبکہ شہریوں کو پاسپورٹ کی ہوم ڈلیوری کی سہولت فراہم کرنے کے لیے ابتدائی تیاریاں بھی مکمل کر لی گئی ہیں۔
وفاقی وزیر داخلہ محسن نقوی کی زیر صدارت پاسپورٹ اینڈ امیگریشن ہیڈکوارٹرز میں ہونے والے اجلاس میں پاسپورٹ کے اجرا کو مکمل طور پر ای پاسپورٹ نظام پر منتقل کرنے کا اصولی فیصلہ کیا گیا۔ حکام کے مطابق اس اقدام سے فراڈ اور جعلسازی کے امکانات میں نمایاں کمی آئے گی۔
اجلاس میں فیصلہ کیا گیا کہ پریمیم سروسز حاصل کرنے والے شہریوں سے پاسپورٹ پر آنے والی لاگت کے مطابق فیس وصول کی جائے گی۔ اس کے علاوہ ملک کے اندر اور بیرون ملک پاسپورٹ کی ہوم ڈلیوری سروس بھی جلد شروع کی جائے گی تاکہ شہریوں کو ان کی دہلیز پر سہولت فراہم کی جا سکے۔
اجلاس میں یکم جولائی سے ملک بھر کے پاسپورٹ دفاتر میں کیش لیس نظام نافذ کرنے کا بھی فیصلہ کیا گیا، جبکہ آن لائن پاسپورٹ درخواستوں کو پاک آئی ڈی پلیٹ فارم پر منتقل کرنے کی منظوری دی گئی تاکہ درخواست کا عمل مزید آسان اور مؤثر بنایا جا سکے۔
وفاقی وزیر داخلہ نے بزنس پاسپورٹ پالیسی کو متعلقہ اداروں کی مشاورت سے جلد حتمی شکل دینے کی ہدایت بھی جاری کی۔
