دبئی میں پری میچ کانفرنس سے خطاب کرتے ہوئے ہیڈ کوچ مائیک ہیسن نے کہا کہ کھلاڑیوں کی بہتری کے لیے ضروری ہے کہ کوچز انہیں کمزوریوں کو بتائیں تاکہ وہ اپنی کارکردگی میں بہتری لاسکیں۔
بابر اور رضوان کی کارکردگی کے سوال پر ہیڈ کوچ نے کہا کہ ہمیشہ کھلاڑیوں کے ساتھ ایمانداری سے بات کرتا ہوں اور انہیں کمزوریوں پر کام کرنے کی ترغیب دیتا ہوں۔
ہیڈکوچ کا کہنا تھا کہ انہوں نے بابر اور رضوان کی اسٹرائیک ریٹ اور پچھلے کچھ میچوں میں کارکردگی پر بات کی تھی، کیونکہ جدید کرکٹ میں اسٹرائیک ریٹ کا بہت اہم کردار ہوتا ہے۔
ان کا کہنا تھا کہ پاک بھارت میچ کا اس بار نیا تجربہ ہوگا، میں نے اس سے پہلے پاک بھارت مقابلے دیکھے ہیں، بھارتی ٹیم پراعتماد نظر آرہی ہے، ہمیں چیلنج کا اندازہ ہے جس کے لیے تیار ہیں۔
ہیڈ کوچ نے کہا کہ ابھی تک پلیئنگ الیون فائنل نہیں کی، پچ دیکھ کر فیصلہ کریں گے۔
مائیک ہیسن نے کہا کہ دبئی کی وکٹ شارجہ سے مختلف ہوگی، پچ کل کے میچ جیسی ہی ہوگی، مجھے نہیں لگتا یہ پچ شارجہ کی طرح اسپنرز کو مدد کرے گی۔
ہیڈ کوچ نے کہا کہ ہمارے پاس ٹیم میں پانچ اسپنرز موجود ہیں، ابرار دنیا کے بہترین بولرز میں شامل ہیں، محمد نواز اس وقت دنیا کے بہترین اسپنرز میں سے ہیں
