وزیراعلیٰ سندھ نے مزار قائد پر میڈیا سے گفتگو کرتے ہوئے کہا کہ ہم سب کو قائداعظمؒ کے وژن پر چلنا ہوگا، پاکستان آج پوری دنیا میں سرخرو ہے۔
ان کا کہنا تھا کہ نوجوانوں کی محنت اور عزم ہی قائد کے خوابوں کی تعبیر ہے، ذوالفقار علی بھٹو نے پاکستان کو ایٹمی طاقت بنایا اور شہید بے نظیر بھٹو نے جمہوریت کے لیے قربانیاں دیں، آج ہم انہیں بھی یاد کرتے ہیں۔
وزیراعلیٰ سندھ نے مخالفین پر تنقید کرتے ہوئے کہا کہ لسانی تقسیم کی کوشش کرنے والے باز رہیں، برساتی مینڈک بھی باہر نکل کر تنقید کررہے ہیں، لوگ سمجھے شاہراہ بھٹوبہہ گئی لیکن ایسا نہیں ہے، شاہراہ بھٹو سینتیس کلومیٹرتک ہے، پندرہ کلومیٹر تک کوئی مسئلہ نہیں ہے، جو زیر تعمیرحصہ تھا اس کو ایشو بنایا گیا۔
انہوں نے کہا کہ ماحولیاتی تبدیلی کے چیلنج سے سب کو مل کر نمٹنا ہوگا ، تنقید کرنے والے مثبت تنقید کریں تاکہ غلطیوں کا فوری ازالہ ہوسکے۔
سیلابی صورتحال پر گفتگو کرتے ہوئے مراد علی شاہ کا کہنا تھا کہ صوبائی حکومت پوری طرح تیار ہے، تمام انتظامات مکمل ہیں اور ہماری اولین ترجیح عوام کی جان بچانا ہے ، سیلاب سے اکیلے نہیں نمٹا جا سکتا، اس کے لیے پوری قوم کا تعاون درکار ہے، اگر ہم متحد رہیں تو ہر آزمائش کا مقابلہ کرسکتے ہیں۔
بین الاقوامی امور پر گفتگو کرتے ہوئے مراد علی شاہ نے اسرائیل کے قطر پر حملے کی شدید مذمت کی اور کہا کہ امت مسلمہ کو اسرائیلی جارحیت کا بھرپور جواب دینا ہوگا۔ ان کا کہنا تھا کہ فلسطین میں معصوم شہریوں کی شہادتوں پر پوری قوم غمگین ہے۔
