بھارت کے گوالیار میں انسٹا گرام ریل بنانے کے جنون نے نوجوان کو لاش بننے پر مجبور کردیا، گوالیار کا ایک نوجوان آدھے گھنٹے تک سیلابی پانی میں لاش بن کرپانی کے اوپر تیرتا رہا۔
غیر ملکی ذرائع ابلاغ کے مطابق مقامی لوگوں نے جب یہ منظر دیکھا تو پولیس کو اطلاع دی، پولیس جب موقع پر پہنچی تو وہ دنگ رہ گئے۔ پانی میں تیرتی لاش حرکت کرنے لگی۔
رپورٹس کے مطابق پولیس کے پہنچنے سے پہلے ہی لوگوں کا ہجوم ڈیم کے قریب پہنچ چکا تھا، لوگ نوجوان کی شناخت کی کوشش بھی کر رہے تھے۔ اس دوران کچھ لوگوں نے گروائی پولیس اسٹیشن کو اطلاع دی۔ پولیس موقع پر پہنچی تو لاش کو نکالنے کے لیے پانی میں جانے لگی، اسی دوران لاش کی ایکٹنگ کرنے والا نوجوان اچانک کھڑا ہوگیا، یہ دیکھ کر موقع پر موجود بھیڑ خوفزدہ ہو گئی۔
پولیس نے نوجوان کو پکڑ کر اس سے پوچھ گچھ کی تو پتہ چلا کہ اس نے ایسا انسٹا گرام ریل کے لئے کیا، نوجوان نے کیمرہ لگا رکھا تھا اور اس کی ریکارڈنگ آدھے گھنٹے سے جاری تھی۔ پورا معاملہ سامنے آنے کے بعد پولس نوجوان کو اپنے ساتھ لے کر روانہ ہوگئی۔
بھارتی میڈیا کے مطابق پولیس نے نوجوان کی کونسلنگ کر کے رہا کر دیا، گوالیار کے سی ایس پی کا کہنا ہے کہ مذکورہ نوجوان گوالیار کے ارون گاؤں کا رہنے والا ہے۔ اس کا نام ٹکو سنگھ ہے۔ تاہم اس واقعے کے بعد نوجوان نے پولیس سے معافی مانگی۔ پولیس نے اسے خبردار کرتے ہوئے آئندہ ایسی حرکتیں نہ کرنے کی تاکید کی۔
