سامعہ حجاب کیس: ’’اب تمہیں کوئی نہیں ڈھونڈ سکے گا

مقتول ٹک ٹاکر ثنا یوسف کی دوست اور ٹک ٹاکر سامعہ حجاب نے اپنے اغوا کی کوشش سے متعلق کئی اہم انکشافات کیے ہیں۔
ابھی اسلام آباد میں ٹک ٹاکر ثنا یوسف کے قتل کی بازگشت ختم نہ ہوئی تھی کہ اس کی ٹک ٹاکر دوست سامعہ حجاب کے اغوا کی کوشش کے واقعہ نے خوف کا ایک نیا تاثر پیدا کر دیا ہے۔ سمیعہ حجاب کو اغوا کرنے والے اس کے سابق منگیتر کو پولیس نے گرفتار کر لیا ہے، تاہم اس کیس سے جڑے کئی حقائق سامنے آ رہے ہیں۔
ایک نجی ٹی وی سے گفتگو کرتے ہوئے سامعہ حجاب نے مذکورہ واقعہ سے متعلق کئی خفیہ گوشوں سے پردہ اٹھاتے ہوئے سنسنی خیز انکشافات کیے ہیں۔
سامعہ حجاب کا کہنا ہے کہ اس کو اغوا کرنے کی کوشش کرنے والا سابق منگیتر حسن زاہد نے اسے گاڑی میں بیٹھنے کا بولا اور کہا کہ اب ہم تمہیں اپنے ساتھ لے کر جائیں گے اور اپنے گھر کے بیسمنٹ میں بند کر دوں گا جس کے بعد کوئی تمہیں نہیں ڈھونڈ سکے گا۔
ٹک ٹاکر نے مزید بتایا کہ حسن زاہد کا گھر لاہور میں ہے اور وہ گاڑیوں کی خرید وفروخت کا کام کرتا ہے۔ 6 ماہ قبل ہماری دوستی ہوئی اور کچھ وقت بعد منگنی کر لی۔ ابتدائی تین ماہ تک وہ میرے ساتھ بہت اچھا رہا، لیکن جب میری دوست ثنا یوسف کے قتل کا واقعہ ہوا تو میں بہت اپ سیٹ ہوئی اور اس کو اگنور کرنا شروع کیا تو وہ اصل روپ میں سامنے آ گیا۔
سامعہ کا کہنا تھا کہ حسن زاہد نہ صرف اربوں روپے کے فراڈ کیس میں نیب کو مطلوب ہے بلکہ وہ اس پر کئی ایف آئی آر بھی درج ہیں۔ جب اس کی یہ حقیقت معلوم ہوئی تو میں نے اس سے شادی سے انکار کر دیا اور انگوٹھی واپس کر دی جس کے بعد وہ ہر جگہ میرا پیچھا کرنا شروع کر کے ہراساں کرنے لگا۔ اس نے مجھے جان سے مارنے، اغوا کرنے کی کوشش بھی کی۔
ٹک ٹاکر کا کہنا تھا کہ ان تین ماہ کے دوران وہ کئی بار میرے پاس آیا، رونا دھونا بھی کیا۔ اس کی والدہ بھی مجھے کہتی ہیں کہ میرا بیٹا اگر مر گیا تو ذمہ دار تم ہوگی۔ وہ خود اپنے بیٹے کو سنبھال نہیں سکتیں اور مجھ پر شادی کے لیے ہاں کرنے پر دباؤ ڈال رہی ہیں۔
سامعہ نے یہ بھی بتایا کہ میں تین ماہ میں 28 فون نمبر بلاک کر چکی ہوں۔ گھر بھی تبدیل کر رہی تھی، لیکن والدہ کی بیماری کے باعث نہیں کر سکی۔
سامعہ حجاب کے اغوا کیس کا ملزم جسمانی ریمانڈ پر پولیس کے حوالے
واضح رہے کہ گزشتہ ہفتہ اسلام آباد میں سامعہ حجاب کے اغوا کی کوشش کا واقعہ سامنے آیا تھا۔ ٹک ٹاکر کی جانب سوشل میڈیا پر اس انکشاف کے بعد پولیس بھی حرکت میں آئی اور ملزم حسن زاہد کو گرفتار کر لیا۔ اسلام آباد پولیس نے ملزم کو عدالت میں پیش کر کے پہلے پانچ روز کا جسمانی ریمانڈ حاصل کیا بعد ازاں عدالت نے اس میں مزید تین روز کی توسیع کر دی۔
ثنا یوسف قتل کیس میں بڑٰی پیش رفت سامنے آگئی