کراچی: گڈز ٹرانسپورٹ کی ہڑتال کے باعث صنعتوں تک خام مال کی رسائی معطل ہو گئی ہے، جس سے ملک کی صنعتی پیداوار متاثر ہونے کا خدشہ پیدا ہو گیا ہے۔
صدر آئرن مرچنٹس، حماد پوناوالا، کا کہنا ہے کہ ہڑتال کی وجہ سے مال نہ ملنے سے صنعتیں بند ہونے کے قریب ہیں اور لوہے کے تاجروں سمیت دیگر اشیاء کے امپورٹرز کو اربوں روپے کا نقصان ہو رہا ہے۔ انہوں نے ٹرانسپورٹرز ایسوسی ایشن سے مسئلہ حل کرنے کی اپیل کی ہے۔
دوسری جانب صدر کے سی سی آئی، ریحان حنیف، نے کہا کہ گڈز ٹرانسپورٹ کی ہڑتال کے باعث پورے ملک کی انڈسٹری بحران کا شکار ہے۔ پورٹ پر جگہ نہ ہونے کی وجہ سے خام مال نہیں پہنچ رہا اور خدشہ ہے کہ آئندہ کل اور پرسوں جہاز لنگر انداز نہیں ہو سکیں گے، جس سے صنعتی سرگرمیاں مزید متاثر ہوں گی۔
