شہر کے مشہور ساحل سی ویو سے تین سالہ بچی کو مبینہ طور پر اغوا کر لیا گیا ہے۔ اغوا کا مقدمہ درخشاں تھانے میں درج کیا گیا، جس میں بچے کے والد محمد وسیم مدعی ہیں۔
مدعی مقدمہ نے بتایا کہ وہ ناظم آباد کے رہائشی ہیں اور عیدالفطر کے تیسرے روز اپنی فیملی کے ہمراہ سی ویو تفریح کے لیے آئے تھے۔ اس دوران ان کی تین بیٹیاں بھی ساتھ تھیں۔ محمد وسیم نے بتایا کہ دو بڑی بیٹیاں رش میں سمندر کی طرف بھاگی ہوئی تھیں، انہیں پکڑنے کے لیے وہ اور ان کی بیوی دوڑے، جبکہ چھوٹی بیٹی وریشہ ساحل پر ریت سے کھیل رہی تھی۔ واپس آنے پر دیکھا کہ وریشہ غائب ہے۔
پولیس نے مقدمہ اغواء کی دفعات کے تحت درج کر کے تحقیقات شروع کر دی ہیں، تاہم تین روز گزر جانے کے باوجود بچی کا کوئی سراغ نہیں ملا۔
