کراچی: قانون نافذ کرنے والے اداروں نے شہر میں منشیات کے مبینہ نیٹ ورکس کے خلاف کارروائی کرتے ہوئے ایک اور اہم گرفتاری عمل میں لائی ہے۔ ذرائع کے مطابق، “شاہ فہد” نامی شخص کو حراست میں لے لیا گیا ہے، جس پر کوکین اور ویڈ کی مبینہ فروخت اور سپلائی کے منظم نیٹ ورک چلانے کا الزام ہے۔
اطلاعات کے مطابق یہ کارروائی انمول پنکی کی گرفتاری کے بعد کی گئی، جب تحقیقاتی اداروں نے منشیات کے مبینہ بین الاقوامی اور ہائی پروفائل روابط کی چھان بین کا دائرہ وسیع کیا۔
ذرائع کا کہنا ہے کہ گرفتار ملزم کا نیٹ ورک کراچی کے پوش اور بااثر حلقوں تک پھیلا ہوا تھا۔ مزید یہ کہ حالیہ دنوں میں ایک معروف اداکار کے بیٹے کی گرفتاری اور اس سے ہونے والی تفتیش کے دوران بھی ملزم کا نام سامنے آیا، جس کے بعد قانون نافذ کرنے والے اداروں نے اس کی گرفتاری کے لیے کارروائیاں تیز کر دی تھیں۔
تحقیقاتی ذرائع کے مطابق، ملزم جدید ٹیکنالوجی اور سوشل میڈیا پلیٹ فارمز کے ذریعے مبینہ طور پر منشیات کی سپلائی کا نیٹ ورک چلاتا تھا اور کراچی کے پوش علاقوں میں منعقد ہونے والی نجی تقریبات اور ڈانس پارٹیوں میں آن لائن آرڈرز کے ذریعے منشیات فراہم کرنے میں ملوث تھا۔
ذرائع کے مطابق زیرِ حراست ملزم سے تفتیش جاری ہے اور اس دوران نیٹ ورک سے وابستہ دیگر افراد اور مبینہ خریداروں کے حوالے سے مزید اہم انکشافات سامنے آنے کا امکان ہے۔
