اسلام آباد: وزیراعظم شہباز شریف سے ایم کیو ایم پاکستان کے وفد نے اہم ملاقات کی، جس میں کراچی اور حیدرآباد کے ترقیاتی منصوبوں سمیت مختلف سیاسی اور انتظامی امور پر تبادلہ خیال کیا گیا۔
ایم کیو ایم پاکستان کے وفد میں ڈاکٹر خالد مقبول صدیقی، ڈاکٹر فاروق ستار، مصطفیٰ کمال، امین الحق اور جاوید حنیف شامل تھے، جبکہ وزیراعظم کے ہمراہ نائب وزیراعظم اسحاق ڈار، رانا ثناء اللہ، احسن اقبال، اعظم نذیر تارڑ اور عطا اللہ تارڑ بھی موجود تھے۔
ذرائع کے مطابق ملاقات کے دوران ایم کیو ایم نے وفاقی بجٹ تجاویز، بلدیاتی حکومتوں سے متعلق مجوزہ آئینی ترمیمی بل اور سندھ میں گورنر کے معاملے پر اپنے مؤقف سے آگاہ کیا۔
ذرائع کا کہنا ہے کہ وزیراعظم شہباز شریف نے ایم کیو ایم کے مطالبے پر کراچی کے لیے 20 ارب روپے اور حیدرآباد کے لیے 5 ارب روپے کے ترقیاتی پیکج کی حمایت کر دی ہے۔
علاوہ ازیں، حکومت نے ایم کیو ایم کے مجوزہ آئینی ترمیمی بل کے حوالے سے پاکستان پیپلز پارٹی سے مشاورت کے لیے تعاون کی یقین دہانی بھی کرائی۔ وزیراعظم نے اس موقع پر کہا کہ پاکستان مسلم لیگ (ن) ایم کیو ایم کے مجوزہ آئینی ترمیمی بل کی حمایت کرتی ہے۔
