پاکستان سمیت ممالک کے درمیان نئے بین الاقوامی معاہدے طے

جدہ: حج ایکسپو 2025 کے دوران پاکستان سمیت متعدد ممالک کے درمیان نئے بین الاقوامی معاہدے طے پاگئے۔تفصیلات کے مطابق جدہ سپر ڈوم میں منعقدہ تین روزہ “حج ایکسپو 2025” بھرپور انداز میں اختتام پذیر ہوگیا۔
نمائش کا انعقاد سعودی وزارتِ حج و عمرہ اور پلگرم ایکسپیرینس پروگرام کے تحت کیا گیا، جس میں دنیا بھر کے 100 سے زائد ممالک کے نمائندوں، ماہرین اور نجی اداروں نے شرکت کی۔
ایکسپو میں ڈیجیٹل سسٹمز، ڈرونز، روبوٹک سروسز اور ایپلیکیشنز کے ذریعے حجاج کی سہولت کے لیے جدید ترین ٹیکنالوجیز پیش کی گئیں۔ نمائش کا نعرہ “مکہ سے دنیا تک” رکھا گیا، جو حج انتظامات میں جدت اور عالمی تعاون کی عکاسی کرتا ہے۔
ماہرین نے مصنوعی ذہانت، ڈیٹا مانیٹرنگ، اور اسمارٹ سسٹمز کے ذریعے حج انتظامات کو مزید بہتر بنانے کے منصوبے پیش کیے۔
اس موقع پر کنگ عبدالعزیز فاؤنڈیشن کی جانب سے حج کی تاریخ اور ثقافت پر خصوصی فورم منعقد کیا گیا، جس میں مختلف ادوار کے حج سفروں کی جھلکیاں پیش کی گئیں۔
نمائش کے دوران پاکستان سمیت متعدد ممالک کے درمیان نئے بین الاقوامی معاہدے بھی طے پائے، جن کا مقصد آئندہ حج سیزن کو مزید منظم اور مؤثر بنانا ہے۔