پاکستان ایگری کلچرل اسٹوریج اینڈ سروسز کارپوریشن (پاسکو) کے پاس گندم کے اسٹریٹیجک ذخائر تقریباً ختم ہوگئے ہیں۔ ذرائع کے مطابق آئی ایم ایف کی اجازت کے باوجود وفاقی اور صوبائی حکومتیں گندم کے حصول میں کامیاب نہ ہوسکیں، جس کے باعث پاسکو کے ذخائر انتہائی کم رہ گئے۔
صورتحال کے پیش نظر اقتصادی رابطہ کمیٹی نے 10 لاکھ ٹن گندم درآمد کرنے کی منظوری دے دی ہے۔ درآمد سے قبل ضروری شرائط پوری کرنے کے لیے اسٹیئرنگ کمیٹی بھی قائم کردی گئی ہے۔ حکام کے مطابق شرائط میں پری شپمنٹ انسپیکشن اور صوبوں کی جانب سے اپنی ضروریات کے لیے درکار رقم کی فراہمی شامل ہے۔
