وزیراعظم شہبازشریف نے سندھ بالخصوص کراچی میں سیلابی صورتحال کا نوٹس لے لیا

وزیراعظم شہبازشریف نے سندھ بالخصوص کراچی میں سیلابی صورتحال کا نوٹس لے لیا۔
وزیراعظم شہبازشریف نے گڈاپ ندی میں شہریوں کے ڈوبنے پر اظہار افسوس کرتے ہوئے متعلقہ اداروں کو سیلاب میں لاپتہ افراد کو جلد از جلد تلاش کرنے کی ہدایت کر دی۔
انہوں نے کراچی میں متحرک امدادی کارروائیوں پر ریسکیو 1122، پاک فوج اور رینجرز کی پذیرائی بھی کی۔
وزیراعظم نے این ڈی ایم اےکو کراچی اورسندھ میں سیلاب کے پیش نظر امدادی کارروائیوں کیلئے تعاون کرنےکی ہدایت کرتے ہوئے کہا کہ عوام کو سیلابی صورتحال سےآگاہ کرنے کیلئے آگاہی مہم مزید متحرک کی جائے، آگاہی مہم کے ذریعےشہری سیلاب جیسی آفت سے بچ سکیں گے۔
قبل ازیں وفاقی کابینہ کے اجلاس میں گفتگو کرتے ہوئے وزیر اعظم شہباز شریف نے کہا کہ حالیہ مون سون بارشوں اور سیلاب نے بڑی تباہی مچائی ہے، خیبر پختونخوا، گلگت بلتستان، آزاد جموں و کشمیر اور پنجاب میں سیلاب اور بارشوں سے تباہی ہوئی ہے۔
وزیر اعظم شہباز شریف نے کہا کہ سیلاب میں ایک ہزار افراد جاں بحق ہو چکے ہیں، اب پانی سندھ کی وادی میں داخل ہو رہا ہے اللہ کرے نقصانات کم ہو، نقصانات کے ازالے کیلیے وفاق کو صوبوں کے ساتھ مل کر کام کرنا ہوگا۔
اجلاس میں انہوں نے وفاقی وزیر منصوبہ بندی احسن اقبال کی سربراہی میں کمیٹی تشکیل دینے کا اعلان کیا جس میں وفاقی وزرا، سیکریٹریز اور چاروں صوبوں کے چیف سیکریٹریز شامل ہوں گے۔