اولپنڈی: مظفرآباد میں پاک فوج کے ایم آئی-17 ہیلی کاپٹر حادثے میں شہید ہونے والے اہلکاروں کی نمازِ جنازہ چکلالہ گیریژن راولپنڈی میں مکمل فوجی اعزاز کے ساتھ ادا کر دی گئی۔
نمازِ جنازہ میں وزیراعظم شہباز شریف اور فیلڈ مارشل سید عاصم منیر نے خصوصی شرکت کی۔ اس موقع پر نائب وزیراعظم اسحاق ڈار، وفاقی وزرا خواجہ آصف اور عطا تارڑ سمیت اعلیٰ سول و عسکری حکام، شہدا کے اہل خانہ اور مختلف شعبہ ہائے زندگی سے تعلق رکھنے والے افراد بھی موجود تھے۔
اس سے قبل شہدا کی نمازِ جنازہ مظفرآباد میں بھی ادا کی گئی تھی، جس میں قائم مقام صدر آزاد کشمیر، وزیراعظم آزاد کشمیر، کور کمانڈر سمیت مقامی شہریوں کی بڑی تعداد نے شرکت کی۔
حادثے میں شہید ہونے والے دو مسیحی جوانوں کی آخری مذہبی رسومات راولپنڈی کے تاریخی کرائسٹ چرچ میں ادا کی گئیں۔ ان رسومات میں بھی سیاسی اور عسکری قیادت نے شرکت کرتے ہوئے شہدا کو خراجِ عقیدت پیش کیا۔
اس موقع پر وزیراعظم شہباز شریف نے شہدا کی قربانیوں کو قوم کے لیے ناقابلِ فراموش قرار دیتے ہوئے کہا کہ وطن کے دفاع کے لیے جانوں کا نذرانہ پیش کرنے والوں کی خدمات کو ہمیشہ یاد رکھا جائے گا۔
