پشاور (10 ستمبر 2025): وزیر اعلیٰ خیبر پختونخوا علی امین گنڈاپور کا کہنا ہے کہ 9 مئی کے بعد سے میرا پاسپورٹ تاحال بلاک ہے۔
میڈیا سے بات چیت میں علی امین گنڈاپور نے کہا کہ کئی بار پاسپورٹ کیلیے اپلائی کیا مگر جاری نہیں کیا گیا، افغانستان جانے کیلیے پاسپورٹ کی ضرورت ہوتی ہے۔
علی امین گنڈاپور نے کہا کہ بانی پی ٹی آئی عمران خان کا حکم ہو تو بغیر پاسپورٹ بھی افغانستان جا سکتا ہوں، افغان حکومت سے بات چیت کرنا صوبے کا نہیں وفاق کا کام ہے۔
انہوں نے مزید کہا کہ وفاقی حکومت نے ایک مشترکہ جرگے کے قیام پر رضامندی ظاہر کی ہے۔
قبل ازیں، چیئرمین پی ٹی آئی بیرسٹر گوہر نے اڈیالہ جیل آمد کے موقع پر صحافیوں سے گفتگو کی۔ انہوں نے ایک سوال کے جواب میں کہا کہ وزیر اعلیٰ خیبر پختونخوا کا 3 سال سے پاسپورٹ بلاک ہے۔
بیرسٹر گوہر نے کہا کہ وہ بغیر پاسپورٹ افغانستان کیسے جا سکتے ہیں؟
