اسلام آباد میں بینظیر انکم سپورٹ پروگرام کی چیئرپرسن سینیٹر روبینہ خالد نے اعلان کیا ہے کہ آئندہ مالی سال سے بی آئی ایس پی کی سہ ماہی قسط بڑھا کر 18 ہزار روپے کر دی جائے گی۔ ان کا کہنا تھا کہ یہ پروگرام غریب اور مستحق خاندانوں کی عزتِ نفس کے تحفظ اور معاشی خودمختاری کو یقینی بنانے میں اہم کردار ادا کر رہا ہے۔
سینیٹر روبینہ خالد نے کہا کہ بینظیر انکم سپورٹ پروگرام کے خلاف منفی پروپیگنڈا قابل مذمت ہے اور حکومت مستحق افراد تک شفاف انداز میں امداد کی فراہمی کے لیے اقدامات کر رہی ہے۔ انہوں نے مزید بتایا کہ جولائی سے بی آئی ایس پی کی تمام ادائیگیاں صرف ڈیجیٹل والٹس کے ذریعے کی جائیں گی تاکہ نظام کو مزید مؤثر اور شفاف بنایا جا سکے۔
