جماعت اسلامی کا اعلان ، پیٹرولیم لیوی اور ٹیکسز کیخلاف آج ملک گیر احتجاج

حافظ نعیم الرحمان کی اپیل پر آج ملک بھر میں پیٹرولیم لیوی اور بھاری ٹیکسز کے خلاف احتجاجی مظاہرے کیے جائیں گے۔ اپنے بیان میں انہوں نے کہا کہ نمازِ جمعہ کے بعد چھوٹے بڑے شہروں میں عوام سڑکوں پر نکل کر حکومت کی پالیسیوں کے خلاف احتجاج ریکارڈ کروائیں گے۔ حافظ نعیم الرحمان کا کہنا تھا کہ پیٹرول پر ایک سو سترہ روپے لیوی اور پچاس روپے ٹیکس لگا کر عوام پر اضافی بوجھ ڈالا جا رہا ہے۔ انہوں نے حکومت پر آئی ایم ایف کے دباؤ میں عوام کا خون نچوڑنے کا الزام بھی عائد کیا۔ امیر جماعت اسلامی نے تاجروں، کسانوں، ٹرانسپورٹرز اور نوجوانوں سے ملک گیر مظاہروں میں بھرپور شرکت کی اپیل کی ہے۔