کراچی: پاکستانی شوبز انڈسٹری سے تعلق رکھنے والے میزبان و اداکار توثیق حیدر اور اداکارہ فرح سعدیہ نے سوشل میڈیا پر گردش کرنے والی اپنے نکاح کی خبروں کی تردید کر دی۔
دونوں نے مشترکہ ویڈیو پیغام میں مزاحیہ انداز اپناتے ہوئے کہا کہ بعض یوٹیوبرز محض زیادہ ویوز اور سنسنی پھیلانے کے لیے بے بنیاد خبریں نشر کر رہے ہیں۔
انہوں نے طنزیہ انداز میں کہا کہ اگر ان یوٹیوبرز نے اس خبر سے 2 لاکھ روپے کما لیے ہیں تو کم از کم 50 ہزار روپے سلامی ہی بھیج دیں، کیونکہ ہماری وجہ سے ہی انہیں یہ آمدنی حاصل ہوئی ہے۔
