بھارت میں جاری طلبہ احتجاج کے دوران کئی معروف کھلاڑی طلبہ کے حق میں سامنے آ گئے ہیں۔ کرکٹ لیجنڈ سچن ٹنڈولکر، اولمپک گولڈ میڈلسٹ ابھینو بندرا، یوراج سنگھ، شیکھر دھون، محمد کیف، میرابائی چانو، ونیش پھوگاٹ اور منو بھاکر نے شفاف، منصفانہ اور میرٹ پر مبنی تعلیمی نظام کے قیام کا مطالبہ کیا ہے۔
سچن ٹنڈولکر نے اپنے پیغام میں کہا کہ ناکامی قبول کی جا سکتی ہے لیکن دھوکہ دہی نہیں۔ انہوں نے طلبہ کو شارٹ کٹس سے گریز کرنے کا مشورہ دیتے ہوئے کہا کہ معاشرے کی ذمہ داری ہے کہ وہ محنت، دیانت داری اور میرٹ کو فروغ دے۔
سابق کرکٹر نے کہا کہ اگر طلبہ کو یہ محسوس ہو کہ ان کی محنت کا مناسب صلہ نہیں مل رہا تو یہ تشویش کی بات ہے، اس لیے ایسا نظام تشکیل دینا ضروری ہے جہاں محنت کا اعتراف ہو اور میرٹ کو کامیابی ملے۔
اولمپک گولڈ میڈلسٹ ابھینو بندرا نے بھی تعلیم کو سیاست سے بالاتر قرار دیتے ہوئے کہا کہ تعلیمی معاملات ہر فرد سے تعلق رکھتے ہیں اور ان پر اجتماعی توجہ ضروری ہے۔
اولمپک میڈلسٹ میرابائی چانو نے طلبہ کے احتجاج پر اظہارِ خیال کرتے ہوئے کہا کہ ایسے واقعات افسوس کا باعث بنتے ہیں اور مسائل کے حل کے لیے سنجیدہ کوششیں ہونی چاہئیں۔
یوراج سنگھ نے کہا کہ ہر طالب علم کو پُرامن ماحول میں تعلیم حاصل کرنے، محفوظ رہنے اور اپنے خواب پورے کرنے کا حق حاصل ہے، جبکہ مذاکرات کے ذریعے بہتر حل تلاش کیا جا سکتا ہے۔
سابق کرکٹر محمد کیف نے بھی طلبہ کے ساتھ اظہارِ یکجہتی کرتے ہوئے کہا کہ تعلیمی نظام کی خامیوں کے خلاف آواز اٹھانے والے طلبہ پر طاقت کا استعمال نہیں ہونا چاہیے اور مسئلے کا جلد حل نکالا جانا چاہیے۔
