لبنان میں اسرائیلی فضائی حملوں کا سلسلہ جاری ہے، جبکہ جنوبی لبنان کے مختلف علاقوں میں تازہ حملوں کے نتیجے میں مزید شہری ہلاکتوں کی اطلاعات سامنے آئی ہیں۔
لبنانی میڈیا کے مطابق جنوبی لبنان میں اسرائیلی کارروائیوں کے دوران کم از کم 8 افراد جان کی بازی ہار گئے۔ شہر صور میں ایک اسپتال کو نشانہ بنائے جانے کے واقعے میں 4 شہری ہلاک جبکہ 50 افراد زخمی ہوئے۔
یہ پیش رفت ایسے وقت میں سامنے آئی ہے جب ایک روز قبل امریکی صدر ڈونلڈ ٹرمپ نے اسرائیلی وزیراعظم بنجمن نیتن یاہو سے ٹیلیفونک گفتگو کے بعد کہا تھا کہ دونوں رہنماؤں کے درمیان مثبت بات چیت ہوئی ہے۔ ٹرمپ کے مطابق اسرائیلی فوج کو بیروت کی جانب پیش قدمی سے روک دیا گیا ہے اور جو فوجی اس سمت روانہ تھے انہیں واپس بلا لیا گیا ہے۔
تاہم تازہ حملوں نے خطے میں کشیدگی اور جنگ بندی سے متعلق خدشات کو دوبارہ بڑھا دیا ہے۔
