اوستہ محمد میں شادی کے صرف 40 روز بعد ایک 20 سالہ خاتون کے قتل کا افسوسناک واقعہ سامنے آیا ہے۔ پولیس کے مطابق مقتولہ کو مبینہ طور پر اس کے شوہر نے اپنے بھائیوں کے ساتھ مل کر تشدد کا نشانہ بنایا، جس کے بعد وہ جانبر نہ ہو سکی۔
پولیس نے فوری کارروائی کرتے ہوئے مقتولہ کے شوہر کو آلۂ قتل سمیت گرفتار کر لیا ہے، جبکہ دیگر ملزمان کی گرفتاری کے لیے کوششیں جاری ہیں۔ مقتولہ کے جسم، خصوصاً چہرے، ہاتھوں اور گردن پر تشدد کے واضح نشانات پائے گئے ہیں۔
مقتولہ کے والد نے الزام عائد کیا ہے کہ ان کی بیٹی کو مبینہ طور پر “کاری” قرار دے کر قتل کیا گیا۔ انہوں نے یہ بھی دعویٰ کیا کہ بااثر ملزمان کی جانب سے دھمکیاں دی جا رہی ہیں، جس کے باعث وہ انصاف کے حصول کے لیے پریس کلب پہنچے اور حکام سے فوری کارروائی کا مطالبہ کیا۔
پولیس کا کہنا ہے کہ واقعے کی مختلف پہلوؤں سے تحقیقات جاری ہیں اور شواہد کی روشنی میں مزید قانونی کارروائی عمل میں لائی جائے گی۔
