آزاد کشمیر قانون ساز اسمبلی کے انتخابات 2026 کے تیسرے مرحلے میں باغ اور حویلی کے 4 حلقوں میں پولنگ کا عمل جاری ہے۔
پولنگ صبح 8 بجے شروع ہوئی جو شام 5 بجے تک بغیر کسی وقفے کے جاری رہے گی۔ باغ کے 3 اور حویلی کے ایک حلقے میں ووٹنگ ہو رہی ہے جبکہ پونچھ کے 5 اور سدھنوتی کے 2 حلقوں میں انتخابات مؤخر کردیئے گئے ہیں۔
چاروں حلقوں میں 4 لاکھ 60 ہزار سے زائد ووٹرز اپنا حقِ رائے دہی استعمال کریں گے، جبکہ سکیورٹی کے بھی سخت انتظامات کیے گئے ہیں۔
انتخابات میں مسلم کانفرنس اور آئی پی پی کے سربراہان سردار عتیق اور سردار تنویر الیاس سمیت وزیراعظم آزاد کشمیر فیصل راٹھور بھی امیدوار ہیں۔
پہلے دو مراحل میں مسلم لیگ ن 24 نشستوں کے ساتھ سرفہرست جبکہ پیپلز پارٹی 10 نشستوں کے ساتھ دوسرے نمبر پر ہے۔
آزاد کشمیر: تیسرے مرحلے میں 4 حلقوں پر ووٹنگ کا عمل جاری
