وزیراعظم پاکستان شہباز شریف نے بھارت کے خلاف فائنل میں شاندار کامیابی پر قومی انڈر 19 کرکٹ ٹیم کے ہر کھلاڑی کے لیے ایک، ایک کروڑ روپے انعام کا اعلان کیا ہے۔
وزیراعظم کی جانب سے ایشین انڈر 19 چیمپئن ٹیم کے اعزاز میں ایک خصوصی استقبالیہ دیا گیا، جہاں شہباز شریف نے تمام کھلاڑیوں کا خود استقبال کیا اور ان کی غیر معمولی کارکردگی کو سراہا۔ اس موقع پر وزیراعظم کے ہمراہ محسن نقوی، وفاقی وزرا اور کابینہ کے دیگر ارکان بھی موجود تھے۔
ذرائع کے مطابق وزیراعظم نے فرداً فرداً تمام کھلاڑیوں سے مصافحہ کیا اور بھارت کے خلاف بہترین کھیل پر ان کی بھرپور حوصلہ افزائی کی۔ وزیراعظم نے خطاب کرتے ہوئے کہا کہ آپ سب نے دنیا بھر میں پاکستان کا نام روشن کیا ہے، بھارت کو بدترین شکست دینے پر پوری قوم آپ کو مبارکباد دیتی ہے۔
شہباز شریف نے کہا کہ انہوں نے خود دیکھا کہ ٹیم کس جوش، جذبے اور نظم و ضبط کے ساتھ میدان میں اتری، جس کی مثال کم ملتی ہے۔ انہوں نے کہا کہ مجھ سمیت تمام پاکستانیوں کو آپ پر فخر ہے۔
وزیراعظم نے کھلاڑیوں سے توقع ظاہر کی کہ وہ اپنی شاندار کارکردگی کا تسلسل برقرار رکھیں گے اور بہت جلد انڈر 19 ورلڈ کپ بھی پاکستان کے نام کریں گے۔ انہوں نے پاکستان کرکٹ بورڈ کے چیئرمین کو ہدایت کی کہ تمام کھلاڑیوں کا بھرپور خیال رکھا جائے اور انہیں ہر ممکن سہولیات فراہم کی جائیں۔
وزیراعظم نے اس موقع پر کہا کہ انڈر 19 ٹیم کے کئی کھلاڑی مستقبل میں پاکستان کی قومی کرکٹ ٹیم کا حصہ بنیں گے۔ انہوں نے شاندار کارکردگی پر سمیر منہاس کو خصوصی شاباش دیتے ہوئے انہیں ٹیم کا ہیرو قرار دیا جبکہ محسن نقوی کو پی سی بی کے امور احسن طریقے سے چلانے پر بھی مبارکباد دی۔
